დღეს, კომპანია „ჯორჯიან უოთერ ენდ ფაუერი” კრწანისის რაიონში, გორგასლის ქუჩაზე, მაგისტრალურ ქსელზე ახალ, ევროსტანდარტის ჩამკეტ-მარეგულირებელ ურდულებს დაამონტაჟებს.

როგორც „ინტერპრესნიუსს“ „ჯორჯიან უოთერ ენდ ფაუერიდან“ აცნობეს, აღნიშნული სამუშაოების შედეგად შესაძლებელი იქნება წყლის ნაკადების ეფექტური მართვა, რაც კრწანისისა და ისნის რაიონებში ქსელზე ტექნიკური სამუშაოების ჩატარების დროს წყალმომარაგების შეზღუდვის არეალებს მნიშვნელოვნად შემცირებს და ნაკლებ დისკომფორტს შეუქმნის მოსახლეობას.

მათივე ინფორმაციით, „ჯორჯიან უოთერ ენდ ფაუერი“ სამუშაოებს, 26 აგვისტოს 23:00 საათზე დაიწყებს და 27 აგვისტოს 23:00 საათზე დაასრულებს.

აღნიშნულ პერიოდში წყალმომარაგება შეეზღუდება კრწანისის რაიონში, გორგასლისა და ორთაჭალის ქუჩების ნაწილს, კრწანისისა და მიმდებარე ქუჩებს. მარჯვენა სანაპიროს ქუჩა N2-ს და N3-ს, ერეკლე მეორეს მოედანს, ლესელიძის, კოტე აფხაზის, შარდენის და მიმდებარე ქუჩებს.

ისნის რაიონში წყალმომარაგება შეეზღუდება ბერი გაბრიელ სალოსის, წულაძის, ზარბრუკერის, ნადირაშვილის, დირსის დასახლების და მიმდებარე ქუჩებს.

წყალმომარაგების შეზღუდვისა და აღდგენის შესახებ ინფორმაციას ჯორჯიან უოთერ ენდ ფაუერი აბონენტებს წინასწარ, SMS-შეტყობინების სახით მიაწოდებს. დეტალური ინფორმაციის მოძიება შესაძლებელია კომპანიის ცხელი ხაზის - 2 93 11 11, ფეისბუქისა და ვებგვერდის მეშვეობით - http://www.gwp.ge