ერთიანი ეროვნული გამოცდებისა და სტუდენტთა საგრანტო კონკურსის აპელაციის შედეგები ცნობილია. როფორც შეფასებისა და გამოცდების ეროვნულ ცენტრში აცხადებენ, შედეგების ნახვა შესაძლებელია შეფასებისა და გამოცდების ეროვნული ცენტრის ვებგვერდებზე: online.naec.ge და www.naec.ge.

მათივე ინფორაციით, აბიტურიენტებს საშუალება აქვთ, საკუთარი შედეგების გვერდზე იხილონ გათანაბრებული და სკალირებული ქულებიც.

" შეგახსენებთ, რომ საგნებში, რომლებშიც ერთზე მეტი ვარიანტი იყო, ხდება ნედლი ქულების გათანაბრება, რის შედეგადაც, ის აბიტურიენტი, რომლის გათანაბრებული ქულაც მინიმალურ ზღვარზე მეტია, აგრძელებს კონკურსში მონაწილეობას. საგანმანათლებლო პროგრამების რეიტინგულ სიაში ცვლილებების შეტანის ვადა 27 აგვისტოს 18:00 საათზე იწურება. შეფასებისა და გამოცდების ეროვნული ცენტრი კიდევ ერთხელ თხოვნით მიმართავს აბიტურიენტებს, რომ პროგრამის არჩევისას ყურადღება მიაქციონ:

• საგანმანათლებლო პროგრამაზე არსებული ადგილების რაოდენობას;

• უმაღლესი სასწავლებლის მიერ საგანმანათლებლო პროგრამაზე ჩასაბარებელი გამოცდისათვის მინიჭებული კოეფიციენტს;

• საგანმანათლებლო პროგრამაზე სწავლის საფასურს;

• საგანმანათლებლო პროგრამის სწავლების ენას;

• გაზრდილია თუ არა უმაღლესი სასწავლებლის მიერ მინიმალური კომპეტენციის ზღვარი;

• აკრედიტებულია თუ არა საგანმანათლებლო პროგრამა (არააკრედიტებული პროგრამა არ ფინანსდება სახელმწიფოს მიერ);

• რომელ ქალაქში მიმდინარეობს სწავლა ამ საგანმანათლებლო პროგრამის მიხედვით. აბიტურიენტები პროგრამების არჩევაში შეზღუდულები არ არიან, ამიტომ ცენტრის რეკომენდაციაა, გამოიყენონ ეს შესაძლებლობა. ცენტრი ასევე აფრთხილებს აბიტურიენტებს, არ დაავიწყდეთ, ნებისმიერი ცვლილების განხორციელების შემდეგ გამოიყენონ ღილაკი - შენახვა. გაითვალისწინონ, რომ კონკრეტული ვადის ამოწურვის შემდეგ საგანმანათლებლო პროგრამების პრიორიტეტულ ჩამონათვალს ვეღარ შეცვლიან. ამის შემდეგ დაიწყება მონაცემთა დამუშავება ჩარიცხვისა და გრანტის განაწილებისთვის“, - ნათქვამია ინფორმაციაში.

ერთიანი ეროვნული გამოცდები 6 ივლისს დაიწყო. გამოცდაზე 39.300-ზე მეტი აბიტურიენტი იყო დარეგისტრირებული და 94% გამოცხადდა. გაოცდებმა უსაფრთხოების წესების დაცვით ჩაიარა. გათვალისწინებული იყო როგორც მაგიდებზე არსებულ დამცავ ფარებთან, თერმოსკრინინგთან, შესაბამისი დისტანციის დაცვასთან, ასევე კორონავირუსის გავრცელების პრევენციასთან დაკავშირებული ყველა რეკომენდაცია.