თბილისის მერიაში "ევროპული საქართველოსთვის“ პლაკატების გაკვრის გამო გამოწერილ ჯარიმებთან დაკავშირებით ადმინისტრაციული საჩივრის განხილვა მიმდინარეობს.
როგორც საჩივრის განხილვის დაწყებამდე „ევროპული საქართველოს“ წევრმა, ირაკლი აბესაძემ ჟურნალისტებს განუცხადა, თბილისის მერიამ „ევროპული საქართველოს“ აქტივისტები, პოლიტიკოსები საარჩევნო პერიოდში საარჩევნო პლაკატების გაკვრისთვის კანონმდებლობის უხეში, არასწორი განმარტებითა და ინტერპრეტაციით დააჯარიმა, რაც კანონის უხეში დარღვევაა.
მისივე განმარტებით, თუ მერია მათ საჩივარს არ დააკმაყოფილებს, მას სასამართლოში გაასაჩივრებენ.
„თუ შევხედავთ თბილისს, ვნახავთ, რამდენი სხვადასხა შინაარსის საინფორმაციო პლაკატია გაკრული და მერე ვნახავთ, რომ მერიას, ფაქტობრივად, არცერთი მათგანი არ ჰყავს დაჯარიმებული. მივხვდებით, რომ ეს იყო „ევროპული საქართველოს“ წინააღმდეგ განხორციელებული პოლიტიკური დასჯის ღონისძიება.თუ ამას დავუმატებთ იმას, რომ ჩვენი აქტივისტების შეჩერებას ცდილობდა, საპატრულო პოლიცია კრიმინალური პოლიცია და ეს ადამიანები ცდებოდნენ საარჩევნო პლაკატის და პოლიტიკური მიზნებით პოლიტიკურ მოწინააღმდეგესთან ბრძოლისთვის, რა თქმა უნდა, ძალიან სავალალო მდგომარეობაში დავინახავთ ხელისუფლებას. იმის ნაცვლად, რომ ეს ადამიანები დაკავდნენ იმ უმძიმესი კრიმინოგენული ვითარებით, რომელიც ქვეყანაში გვაქვს, პოლიტიკურ ოპონენტებს პოლიტიკური პარტიის დაკვეთით დასდევდნენ და ახალგაზრდებს აჯარიმებდნენ. ეს არის უკანონო ჯარიმა, რომელიც დღეს მერიაში განიხილება", - განაცხადა აბესაძემ.