მოძრაობა “შეცვალე” საქართველოში მცხოვრებ ბელარუს ხალხთან ერთად პარლამენტის შენობასთან ბელარუსის მოსახლეობის მხარდასაჭერ აქციას მართავს.

აქციის მონაწილეებს ტრანსფარენტები უჭირავთ წარწერით: “საქართველო, დაგვეხმარე დიქტატორის წართმეული არჩევნების დაბრუნებაში”; “ლუკაშენკო არის მკვლელი”. აქტივისტები სკანდირებენ სიტყვებს - “გაუმარჯოს ბელარუსს”.

მათ პარლამენტის შენობასთან მინიატურული თბილისის ანძა მიიტანეს, რომელიც სიმბოლურად ბელარუსის ძველი დროშის ფერებშია შეღებილი.

როგორც აქციის მონაწილეები ამბობენ, მათ წერილით მიმართეს დედაქალაქის მერს თბილისის ანძის ბელარუსის დროში ფერებში განათების თაობაზე, თუმცა უშედეგოდ.

“ჩვენ ახალგაზრდები შევიკრიბეთ პარლამენტის შენობასთან საქართველოში მცხოვრებ ბელარუს ხალხთან ერთად და სოლიდარობას ვუცხადებთ იმ ადამიანებს, რომლებიც ბელარუსში დღეს იბრძვიან თავისუფლებისთვის. ქართველები და ბელარუსები დღეს ერთი გასაჭირის წინაშე დგანან. ერთხელ და სამუდამოდ, უნდა გავთავისუფლდეთ ამ რუსული, საბჭოთა მარწუხებიდან. ამიტომ ერთხელ და სამუდამოდ, რუსული დიქტატურა პოსტსაბჭოთა სივრცეში უნდა დასრულდეს. ბელარუსი ხალხი არის თავისუფლებისთვის მებრძოლი ხალხი და ეს ბრძოლა მათ სასიკეთოდ უნდა დასრულდეს”,- განაცხადა მოძრაობა “შეცვალეს” წევრმა ტიტე გედენიძემ.