„ევროპული საქართველოს“ ერთ-ერთი ლიდერის ირმა ნადირაშვილის განცხადებით, თეა წულუკიანის ინიციატივა იმის გამოხატულებაა, რომ „ქართული ოცნება“ არის მავნებელი და ბოროტი.
„ალბათ, არ დარჩება არც ერთი ადამიანი, რომელიც გულგრილად შეხედავს იუსტიციის მინისტრის თეა წულუკიანის ინიციატივას. „ქართულმა ოცნებამ“ და წულუკიანმა გადაწყვიტეს ჩაერიონ ადამიანების ყველაზე უფრო პირად საქმეში. ეს არის პირდაპირ ოჯახის საკითხებში ჩარევა, წყვილების საკითხებში ჩარევა, ეს არის აბსურდული ინიციატივა. თუ წულუკიანს აქვს პრეტენზია, რომ მან უნდა იფიქროს ყველა წყვილის ნაცვლად თუ როდის სურთ მათ შვილების ყოლა - ეს არის ამ მავნებელი და ბოროტი ქალის ძალიან ცუდი განზრახვა, რასაც ვერ განახორციელებს“, - განაცხადა ირმა ნადირაშვილმა.
ცნობისთვის, ბრძანებას იუსტიციის მინისტრმა 25 აგვისტოს მოაწერა ხელი. სამოქალაქო აქტების რეგისტრაციის წესში ცვლილებები 2020 წლის 1-ლი სექტემბრიდან ამოქმედდება.
ცვლილებების თანახმად, განაყოფიერებამდე ნოტარიულად დადებული ხელშეკრულების მხარე შეიძლება იყოს "ქალისა და მამაკაცისგან შემდგარი წყვილი, რომლის მიზანსაც წარმოადგენს ექსტრაკორპორული გზით დაბადებული ბავშვის აღზრდა" იმ შემთხვევაში, თუ ისინი: იმყოფებიამ ქორწინებაში და ქორწინებიდან გასულია სულ მცირე, 1 წელი; იმყოფებიან ფაქტობრივ თანაცხოვრებაში, სულ მცირე, უკანასკნელი 1 წლის განმავლობაში. ქალისა და მამაკაცის ფაქტობრივ თანაცხოვრებაში ყოფნის ფაქტი ნოტარიუსის წინაშე უნდა დადასტურდეს შესაბამისი დოკუმენტებით.