რუსეთის ფედერალურმა უსაფრთხოების სამსახურმა სახელმწიფო საიდუმლო ინფორმაციის უკრაინისთვის გადაცემის ბრალდებით სამხედრო პირი დააკავა.
მედიის ინფორმაციით, რუსეთის სტრატეგიული სარაკეტო ძალების სამხედრო მოსამსახურე ციმბირის ქალაქ ბარნაულში დააკავეს.
რუსეთის უსაფრთხოების სამსახურის მიერ გავრცელებულ განცხადებაში აღნიშნულია, რომ სამხედრო მოსამსახურე, სავარაუდოდ, სახელმწიფო საიდუმლოს გადასცემდა უკრაინის თავდაცვის სამინისტროს მთავარ სადაზვერვო სამსახურს.
მათივე ინფორმაციით, სისხლის სამართლის საქმე სახელმწიფო ღალატის მუხლით აღიძრა. ბრალის დამტკიცების შემთხვევაში დაკავებულს 20 წლამდე პატიმრობა ემუქრება.