„ნაციონალური მოძრაობის" წევრის თინათინ ბოკუჩავას განცხადებით, პარტიის გადაწყვეტილება, რომლის თანახმადაც ისნის მაჟორიტარ კანდიდატად ხატია დეკანოიძე დაასახელეს, არ შეიცვლება. მისივე თქმით, მალე აღნიშნავენ "ბიძინა ივანიშვილის რეჟიმის დასრულებას".
"გასაგებია, რომ არის აზრთა გარკვეული სხვადასხვაობა, მაგრამ ჩვენ გვაქვს ჩვენი მოსაზრება და სამდივნოს ხმათა უმრავლესობით მიღებული გადაწყვეტილება, რომელიც არ შეიცვლება. ამიტომ "ნაციონალური მოძრაობის" „მტრის ხატად“ ქცევის კამპანია, რომელიც ბიძინა ივანიშვილს უშედეგოდ ჰქონდა 8 წლის განმავლობაში, ამ უშედეგო, უსაგნო კამპანიის მედროშეებად არ უნდა ვიხილოთ ოპიზიციური პარტიები, რომელთან ერთადაც ჩვენც ძალიან მალე აღვნიშნავთ ივანიშვილის რეჟიმის დასრულებას", - განაცხადა თინათინ ბოკუჩავამ.
შეგახსენებთ, რომ ოპოზიციიდან ისნის მაჟორიტარულ კანდიდატად „სტრატეგია აღმაშენებლის“ ლიდერი გიორგი ვაშაძე და „ნაციონალური მოძრაობის“ წევრი ხატია დეკანოიძეა დასახელებული.