ელენე ხოშტარია - თეა წულუკიანმა გადაწყვიტა, რომ ადამიანების პირად ცხოვრებაში ჩაერიოს და განუსაზღვროს, როდის, ვის, როგორ მოუნდება ბავშვის გაჩენა
თეა წულუკიანმა გადაწყვიტა, რომ ადამიანების პირად ცხოვრებაში ჩაერიოს და განუსაზღვროს, როდის, ვის, როგორ მოუნდება ბავშვის გაჩენა,- ასე გამოეხმაურა “ევროპული საქართველოს” ერთ-ერთი ლიდერი ელენე ხოშტარია იუსტიციის მინისტრის ბრძანებას.
ხოშტარიას თქმით, ეს ბრძანება უნდა გაუქმდეს.
“დაუჯერებელი ინიციატივაა. მიუხედავად იმისა, რომ “ქართული ოცნებისგან” ბევრის მოლოდინი შეიძლება გქონდეს, ეს წარმოუდგენელია, ჯერ ერთი სამართლებრივი შინაარსით - ეს არის არაკონსტიტუციური ინიციატივა და მეორე, ეს არის არაადამიანური ინიციატივა”,- განაცხადა ხოშტარიამ.
ცნობისთვის, სუროგაციის გზით შვილის ყოლას მარტოხელა მშობლები ვეღარ შეძლებენ. იუსტიციის მინისტრის ბრძანებით, ამისთვის წყვილს სულ მცირე ერთწლიანი ქორწინება ან ამავე პერიოდით თანაცხოვრება მოეთხოვება.
კერძოდ, სუროგაციის გზით დაბადებული ბავშვის რეგისტრაციისთვის, აუცილებელია სანოტარო წესით დამოწმებული ხელშეკრულების გაფორმება, რომლის ხელმომწერი მხარე ცვლილებების თანახმად, შეიძლება იყოს მხოლოდ ქალისა და მამაკაცისგან შემდგარი წყვილი, რომელიც ქორწინებაში იმყოფება არანკლებ ერთი წლის განმავლობაში, ან იმყოფებიან ფაქტობრივ თანაცხოვრებაში სულ მცირე უკანასკნელი ერთი წლის განმავლობაში.
