ხედავთ, რომ ჩვენ უკრაინასთან კვლავ გვაქვს ძალიან მაღალი სტრატეგიული პარტნიორობა. საერთო ინტერესებისკენ სწრაფვა და ბრძოლა, უკრაინასთან ერთად, რა თქმა უნდა, გაგრძელდება, - ამის შესახებ პარლამენტის თავდაცვისა და უშიშროების კომიტეტის თავმჯდომარე ირაკლი სესიაშვილმა ჟურნალისტებს განუცხადა.
ჟურნალისტების კითხვაზე, იქონია თუ არა გავლენა პარტნიორ ქვეყნებს შორის უკრაინიდან საქართველოს ელჩის გამოწვევამ, სესიაშვილმა აღნიშნა, რომ ეს უკრაინული მხარისთვის მოულოდნელი არ ყოფილა.
„პრემიერ-მინისტრმა განაცხადა, რომ ჩვენ აბსოლუტურად ვრჩებით სტრატეგიულ პარტნიორებად. რაც შეეხება ელჩის გამოწვევას, ეს მოულოდნელი არ ყოფილა უკრაინული მხარისთვის. ჩვენ მათ ღიად ავუხსენით, მაშინ, როდესაც ქვეყანაში მსჯავრდებულ პირს უკრაინაში მაღალ თანამდებობაზე ნიშნავენ, ეს, რა თქმა უნდა, ჩვენთვის პრობლემა იქნებოდა, რადგან ნიშნავენ იმ პირს, რომელიც საქართველოს წინააღმდეგ არ იშურებს მძიმე განცხადებებს. ამიტომ, ცხადია, ეს ჩვენთვის პრობლემა იყო და ეს უკრაინულმა მხარემაც მიიღო ისე, როგორც მიიღო“, - განაცხადა ირაკლი სესიაშვილმა.