პარტია „ჩვენი საქართველო - სოლიდარობის ალიანსის" წარმომადგენლებმა ზუგდიდში მაჟორიტარობის კანდიდატი დაასახელეს. პარტიის ერთ-ერთი ლიდერის მარიამ ჯაშის განცხადებით, მათ მაჟორიტარობის კანდიდატები ყველა რეგიონში ეყოლებათ, წარდგენის პროცედურები კი ზუგდიდიდან დაიწყო.
„პროცესს ვიწყებთ ზუგდიდიდან, სამეგრელოდან, რადგან მიგვაჩნია, რომ სამეგრელო არის განსაკუთრებული ღირებულებების მატარებელი მხარე საქართველოს ერთიანობისთვის აღდგენის გზაზე. ჩვენ ზუგდიდელებს წარვუდგენთ ერთ - ერთ ყველაზე ძლიერ და ღირსეულ კანდიდატს, რომელიც იბრძოლებს მაჟორიტარობისთვის, ჯამბულ ნაჭყებიას, რომელსაც აქვს უდიდესი გამოცდილება როგორც საგანმანათლებლო, ასევე სამეცნიერო სფეროში. ის გახლავთ სოციალურ მეცნიერებათა დოქტორი, რომელმაც არაჩვეულებრივად იცის ზუგდიდისთვის მნიშვნელოვანი საკითხები და ზოგადად სამეგრელოსთვის მნიშვნელოვანი პრიორიტეტები. ჯამბულ ნაჭყებია გახლავთ სწორედ ის პიროვნება, თავისი გამოცდილებით, ცოდნით და განვლილი გზით, რომელიც უპირობოდ იმსახურებს ზუგდიდელების ნდობას",- განაცხადა მარიამ ჯაშმა.