ვაკის მაჟორიტარულ ოლქში პარტია „ლელო საქართველოსთვის“ კანდიდატის ლევან კობერიძის განცხადებით, “ქართული ოცნება” აპირებს საარჩევნო კამპანია კორონავირუსთან და მიხეილ სააკაშვილთან ერთად ჩაატაროს.
როგორც კობერიძე აცხადებს, მიხეილ სააკაშვილის ჩამოსვლა-არჩამოსვლის საკითხი „ქართულ ოცნებასთან” ერთად პოლიტიკურ წარსულში უნდა გადავიდეს.
„ვხედავთ, რომ „ქართული ოცნების” ერთადერთი მთავარი პოლიტიკური ინსტრუმენტი არის სააკაშვილის ჩამოსვლა საქართველოში, ეს დაპირება და ამაზე გულზე მჯიღის ცემა და განცხადებების გაკეთება. არ არის ეს ადამიანებისთვის პოლიტიკური დღის წესრიგი, არ არის ეს ადამიანების ყველაზე მთავარი საზრუნავი და სატკივარი. არანაირად “ქართულ ოცნებას” ეს ტრიუკი კიდევ ერთხელ არ გაუვა, რადგან არიან ისეთი ახალი პარტიები, როგორიცაა “ლელო საქართველოსთვის”, - განაცხადა კობერიძემ.
როგორც ის აცხადებს, “ქართული ოცნება” წინასაარჩევნო კამპანიისთვის ადმინისტრაციულ რესურსს სრულად იყენებს.
„წინასაარჩევნო გარემო არ მოასწავლებს არაფერს კარგს. წინასარჩევნო კამპანია „ქართულ ოცნებას” უკვე დიდი ხანია დაწყებული აქვს ამომრჩევლის ბიუჯეტის ხარჯზე მოსყიდვის გზით. ჩართული ყავს ძალოვანი სტრუქტურები და იყენებს ადმინისტრაციულ რესურსს. ჩვენი კანდიდატების მოსახლეობასთან შეხვედრის დროს უამრავი ფაქტია დაფიქსირებული, როდესაც გამგეობის, მერიების წარმომადგენლები მიდიან მოსახლეობის ზეწოლის და დაშინების მიზნით. ადმინისტრაციული რესურსი, შეიძლება ითქვას, სრულად არის ამოქმედებული. კორონავირუსის თემას საბოლოოდ თავისთვის იყენებენ. ხუმრობით ვიტყვი, რომ იმდენად გვერდში დაიყენა და მოკავშირედ გაიხადა კორონავირუსი “ქართულმა ოცნებამ”, რომ კორონავირუსმაც სიყვარულით უპასუხა და “ქართული ოცნების” ოფისიდან დაიწყო პოლიტიკურ სპექტრში დაინფიცირება”,- განაცხადა კობერიძემ.