თურქეთში, ბოლო 24 საათში, კორონავირუსის 1 596 ახალი შემთხვევა დადასტურდა და ინფიცირებულთა საერთო რაოდენობა 273 301-მდე გაიზარდა, - ამის შესახებ ინფორმაციას ადგილობრივი მედია ქვეყნის ჯანდაცვის მინისტრ ფაჰრეთინ კოჩაზე დაყრდნობით ავრცელებს.
მათივე ინფორმაციით, მესამე დღეა, ქვეყანაში "კოვიდ 19"-ის ახალი შემთხვევები 1 500-ს აჭარბებს.
ჯანდაცვის მინისტრის განცხადებით, თურქეთში კორონავირუსის პანდემიამ პიკს მეორედ მიაღწია. მან განმარტა, რომ ინფიცირების ყველაზე მეტი შემთხვევა დედაქალაქ ანკარაშია დადასტურებული.
რაც შეეხება ფატალურ შემთხვევებს, თურქეთში, გასული დღე-ღამის განმავლობაში, "კოვიდ 19"-ს კიდევ 45 ადამიანის სიცოცხლე ემსხვერპლა და დაღუპულთა რიცხვმა, საერთო ჯამში, 6 462-ს მიაღწია.