ბულგარეთის დედაქალაქ სოფიაში ანტისამთავრობო საპროტესტო აქციის დროს სამართალდამცავებმა 60-მდე ადამიანი დააკავეს, - ამის შესახებ ინფორმაციას „დოიჩე ველე“ ადგილობრივ პოლიციაზე დაყრდნობით ავრცელებს.
„დოიჩე ველე“ წერს, რომ ორგანიზატორები მშვიდობიან აქციას გეგმავდნენ, თუმცა დემონსტრანტებმა პოლიციელებს ბოთლები, ქვები, კუსტარულად დამზადებული პიროტექნიკა დაუშინეს და მათი მანქანები დააზიანეს.
დაპირისპირების დროს აქციის მონაწილეებმაც და სამართალდამცავებმაც ე.წ. „წიწაკის“ სპრეი გამოიყენეს. არეულობების შედეგად 45-მდე ადამიანი, მათ შორის სამართალდამცავები, საავადმყოფოში მოხვდა.
სოფიასა და ბულგარეთის სხვა ქალაქებში საპროტესტო აქციები უკვე მეორე თვეა მიმდინარეობს. დემონსტრანტები ქვეყნის მოქმედი პრემიერ - მინისტრის, ბოიკო ბორისოვისა და მთავარი პროკურორის, ივან გეშოვის, გადადგომას ითხოვენ.