პროკურორ ამირან გულუაშვილის ინფორმაციით, ვერონიკა არონია არა მხოლოდ არ შესწრებია 4 პირის საუბარს, არამედ ის ფიზიკურად იმყოფებოდა თავის საცხოვრებელ ბინაში. პროკურორის განმარტებით, გამოძიებას საკმაოდ დიდი რესურსი დასჭირდა იმისთვის, რომ არონიას მიერ სამართალდამცველებისთვის მიწოდებული ინფორმაცია გადაემოწმებინა.

„საუბარია იმაზე, რომ მან გამოძიება შეიყვანა შეცდომაში და გამოძიების წინაშე სამჯერ გამოკითხვისას მოჰყვა მის მიერ გამოგონილი ამბავი. საკმაოდ დიდი რესურსი დასჭირდა გამოძიებას იმისთვის, რომ გადაემოწმებინა ეს ინფორმაცია. რაც შეეხება უშუალოდ დანაშაულის გარემოებებს, მოცემულობა ძალიან მარტივია - ამ ადამიანის განცხადებით, ის იმყოფებოდა მისი საცხოვრებელი კორპუსის მიმდებარე ეზოში, ასეირნებდა ბავშვს, რა დროსაც ის შეესწრო თითქოსდა 4 პირის საუბარს შაქარაშვილის საქმესთან დაკავშირებით. ჩატარებული გამოძიება და მათ შორის, ვიდეოჩანაწერები ამოღებული მიმდებარე ტერიტორიიდან, ისევე როგორც მობილური კავშირგაბმულობის ოპერატორის ჩვენებები, ასევე მოწმეთა ჩვენებები, რომლებიც მნიშვნელოვანი გარემოებაა მოცემულ სისხლის სამართლის საქმეში, ადასტურებენ, რომ ადამიანი არა მარტო არ შესწრებია ამ 4 პირის საუბარს, ის ფიზიკურად იმყოფებოდა მის საცხოვრებელ ბინაში და ლოკაციებს შორის არის ძალიან დიდი სხვაობა. შესაბამისად, ამას აფუძნებს ბრალდება საკუთარ პოზიციას. ამ ეტაპისთვის დაკავებული დანაშაულს აღიარებს,“- განაცხადა პროკურორმა ამირან გულუაშვილმა.