„ქართული ოცნების“ აღმასრულებელი მდივანი ირაკლი კობახიძე რუსეთის სახელმწიფო დუმის თავდაცვის კომიტეტის თავმჯდომარის მოადგილე იური შვიტკინის განცხადებას, რომ მომწამვლელ ქიმიურ ნივთიერებებს საქართველოსა და აშშ-ში ამზადებენ, არასერიოზულს უწოდებს. მისი თქმით, ფაქტი გამოძიებას საჭიროებს.

„რაც შეეხება რუსეთის ქმედებებს, ზოგადად, ამასთან დაკავშირებით ჩვენი პოზიცია არის ცალსახა და ეს პოზიცია არის ყველასთვის ცნობილი”,- განაცხადა კობახიძემ.

როგორც ის აღნიშნავს, რუსეთს არ ახარებს საქართველოს წარმატება და მსგავსი განცხადებებიც ამის შედეგია.

„სამწუხაროდ, რუსეთისთვის დეზინფორმაცია არის ბრძოლის ერთ-ერთი იარაღი. ბუნებრივია ამ დეზინფორმაციას ჩვენ დავუპირისპირებთ სიმართლეს“,- განაცხადა კობახიძემ.

ცნობისთვის, რუსეთის სახელმწიფო დუმის თავდაცვის კომიტეტის თავმჯდომარის მოადგილე იური შვიტკინი აცხადებს, რომ რუსეთი არ არის დაკავებული „ნოვიჩოკის“ ჯგუფის ქიმიური ნივთიერების დამზადებით და მსგავსი ლაბორატორიები საქართველოსა და აშშ-ის ტერიტორიებზე არსებობს. ამის შესახებ რუსმა დეპუტატმა სააგენტო „რია ნოვოსტის“ განუცხადა.