ალექსანდრე ლუკაშენკომ სახელმწიფო უშიშროების კომიტეტის (კგბ-ს), უშიშროების საბჭოსა და სახელმწიფო კონტროლის კომიტეტის ახალი ხელმძღვანელები დანიშნა, - ამის შესახებ ინფორმაციას ადგილობრივი მედია ავრცელებს.
მათივე ინფორმაციით, სახელმწიფო კონტროლის კომიტეტის ყოფილი უფროსი ივან ტერტელი კგბ-ს უხელმძღვანელებს, სახელმწიფო უშიშროების კომიტეტის ყოფილი თავმჯდომარე ვალერი ვაკულჩიკი კი ქვეყნის უშიშროების საბჭოს მდივნად დაინიშნა. სახელმწიფო კონტროლის კომიტეტის მოქმედ ხელმძღვანელად კი ლუკაშენკომ ვასილი გერასიმოვი დანიშნა.
აღსანიშნავია, რომ ბოლო პერიოდში ბელარუსის უსაფრთხოების ძალები ყურადღების ცენტრშია მოქცეული. გაეროს ადამიანის უფლებების ექსპერტებმა რამდენიმე დღის წინ განაცხადეს, რომ პოლიციის მიერ დემონსტრანტების წამების, ცემისა და არასათანადოდ მოპყრობის ფაქტების შესახებ ასობით შეტყობინება მიიღეს. ბელარუსის ხელისუფლება დაკავებულების შეურაცხყოფისა და დემონსტრანტების წინააღმდეგ არასათანადო ქმედებების შესახებ ინფორმაციას უარყოფს.