„ლელო საქართველოსთვის“ „მარშალის გეგმის” - საქართველოს რეკონსტრუქციის პროგრამის პრეზენტაციას მართავს. როგორც პარტიის ერთ-ერთმა ლიდერმა ბადრი ჯაფარიძემ განაცხადა, აღნიშნული გეგმა საქართველოს ეკონომიკის ძირეულ რეკონსტრუქციას გულისხმობს. მისი თქმით, საქართველო ფუნდამენტურ ცვლილებებს საჭიროებს.

“სახელწოდება, რომელიც ავირჩიეთ ჩვენი პროგრამისთვის გამომდინარეობს იმ გარემოებიდან, რომ ომის შემდგომ, როდესაც გერმანიის ეკონომიკა მთლიანად დანგრეული იყო, გერმანიაში შემუშავებული იქნა სპეციალური გეგმა, სახელმწიფო მდივნის, მარშალის მონაწილეობით და ამ გეგმას ეწოდა “მარშალის გეგმა”, იმიტომ, რომ ის გულისხმობდა, ფუნდამენტურ და ძირეულ ღონისძიებებს ეკონომიკის აღსადგენად. საქართველო საჭიროებს ფუნდამეტურ ცვლილებებს. ჩვენი ეკონომიკა საჭიროებს სრულიად ახლებურ და ინოვაციურ მიდგომას იმისათვის, რომ გამოვიდეთ იმ ღრმა კრიზისიდან, რომელშიც აღმოვჩნდით. გარდა ამისა, უნდა გვახსოვდეს, რომ ჩვენი ქვეყნის 20% ოკუპირებულია. ამიტომ საქართველოს რეკონსტრუქციისა და ეკონომიკის აღორძინების ცვლილებებისათვის აუცილებელია რადიკალური ნაბიჯები და ამიტომ ვუწოდეთ ჩვენს პროგრამას “ლელოს” “მარშალის პროგრამა” საქართველოს რეკონსტრუქციისათვის”,- განაცხადა ჯაფარიძემ.