ბანგლადეშში, ნარაიანგანჯის რაიონში, მეჩეთში აფეთქების შედეგად 13 ადამიანი დაიღუპა, 30 კი დაშავდა, - ამის შესახებ ინფორმაციას „როიტერსი“ ავრცელებს.
სააგენტოს ცნობით, არ არის გამორიცხული, დაღუპულების რაოდენობა კიდევ უფრო გაიზარდოს, ვინაიდან ზოგიერთი დაშავებულის მდგომარეობა მძიმეა.
წინასწარი ინფორმაციით, აფეთქება გაზის გაჟონვამ გამოიწვია. ადგილობრივი ხელისუფლების წარმომადგენლები აცხადებენ, რომ გაზი, სავარაუდოდ, მეჩეთში იყო დაგროვილი, სადაც ფანჯრები დახურული იყო.
„ვვარაუდობთ, რომ გაზსადენიდან გაჟონილი გაზი მეჩეთში დაგროვდა, სადაც ფანჯრები დახურული იყო. ხოლო როდესაც იქ კონდიციონერი ჩართეს, აფეთქება მოხდა,“- განაცხადა სახანძრო სამსახურის უფროსმა აბდულა ალ არეფინმა.
მისივე თქმით, მეჩეთში ექვსივე კონდიციონერი აფეთქდა. ხელისუფლებამ მომხდარის გამოძიება დაიწყო.