ბაღდადის აეროპორტთან ახლოს "კატიუშას" ტიპის სამი რაკეტა ჩამოვარდა, - ამის შესახებ ინფორმაციას ერაყის საინფორმაციო სააგენტო INA ავრცელებს.
სააგენტოს ცნობით, ინციდენტს მსხვერპლი არ მოჰყოლია. ერთ-ერთი რაკეტა აეროპორტის ავტოფარეხს დაეცა, სადაც ოთხი ავტომობილი დაზიანდა.
აღსანიშნავია, რომ გასულ კვირას მსგავსი სამი ინციდენტი მოხდა. რაკეტები აეროპორტთან ახლოს და ე.წ. „მწვანე ზონაში“ ამოვარდა, სადაც უცხოური მისიები და აშშ-ს საელჩო მდებარეობს. ინციდენტებს მსხვერპლი არ მოჰყოლია.
ოფიციალური ვაშინგტონი თავდასხმებზე პასუხისმგებლობას ირანის მიერ მხარდაჭერილ გასამხედროებულ დაჯგუფებებს აკისრებს.
ახლო აღმოსავლეთში კონფქლიქტი მას შემდეგ გამწვავდა, რაც მიმდინარე წლის იანვარში, აშშ-ის სამხედროების მიერ განხორციელებული ოპერაციის დროს, ბაღდადის აეროპორტში ირანის ისლამური რევოლუციის გუშაგთა კორპუსის ქვედანაყოფის, „ყუდსის ძალების“ მეთაური გენერალი ყასემ სულეიმანი და ერაყის სამხედრო დაჯგუფების მეთაური აბუ მაჰდი ალ-მუჰანდისი დაიღუპნენ და ირანის მიერ მხარდაჭერილი გასამხედროებული დაჯგუფებები მათი სიკვდილის გამო შურისძიებით დაიმუქრნენ.