დღეს თბილისის საქალაქო სასამართლო 15 წლის მოზარდის, ლუკა სირაძის გარდაცვალების საქმეზე განაჩენს გამოაცხადებს. ლუკა სირაძის ოჯახის ინტერესებს საია იცავს.

ლუკა სირაძის საქმეზე ბრალი გამომძიებელ მარიამ ჩოლოიანს აქვს წარდგენილი. მას თბილისის საქალაქო სასამართლომ აღკვეთის ღონისძიების სახით პატიმრობა 19 დეკემბერს შეუფარდა.

“დაველოდები, რომ სასამართლო გამოიტანს გამამტყუნებელ განაჩენს და ჩოლოიანს კანონის შესაბამისად მიუსჯიან სასჯელის მაქსიმალურ ვადას. იმ შემთხვევაში, თუ გამამართლებელ განაჩენს გამოიტანენ, რაც არ მგონია, გავასაჩივრებთ”, - განაცხადა ლუკა სირაძის ძმამ, ბექა სირაძემ.

სახელმწიფო ინსპექტორის სამსახურმა ლუკა სირაძის საქმეზე, პოლიციის კიდევ რამდენიმე თანამშრომლის მხრიდან ადმინისტრაციული გადაცდომა გამოკვეთა.

შეგახსენებთ, 15 წლის მოზარდი ლუკა სირაძე, რომელმაც პოლიციაში გამოკითხვის შემდეგ თვითმკვლელობა სცადა,17 დეკემბერს საავადმყოფოში გარდაიცვალა.