გიორგი შაქარაშვილის საქმის პროკურორის დავით ყაზარაშვილის განცხადებით, შაქარაშვილის მკვლელობის საქმეზე ბრალდებულების საკნებში ვიდეო და აუდიო ჩაწერა სასამართლოს განჩინების საფუძველზე ჩატარდა და სხვა მტკიცებულებებთან ერთად ეს მასალები ბრალდების მხარემ 3 სექტემბერს მხოლოდ დაცვის მხარეს გადასცა.

ყაზარაშვილი თქმით, რადგან შაქარაშვილის მკვლელობის საქმეზე გამოძიება დასრულებულია, ბრალდებულების საკნებში საგამოძიებო მოქმედებების ჩატარება დასრულებულია და ჩაწერა არ მიმდინარეობს.

„გიორგი შაქარაშვილის მკვლელობის სისხლის სამართლის საქმეზე ბრალდებულების საპატიმრო საკნებში სასამართლოს განჩინების საფუძველზე ჩატარებული საგამოძიებო მოქმედებების თაობაზე დამატებით განვმარტავთ, რომ ვინაიდან, გიორგი შაქარაშვილის მკვლელობის სისხლის სამართლის საქმეზე დასრულდა გამოძიება და საქმე არსებითად განსახილველად წარიმართა სასამართლოში, საგამოძიებო მოქმედებები, მათ შორის ბრალდებულთა საპატიმრო საკნებში დასრულებულია და შესაბამისად არ მიმდინარეობს აუდიო-ვიდეო ჩაწერა. ასევე, კიდევ ერთხელ ხაზგასმით ვაცხადებთ, რომ საგამოძიებო მოქმედებები სასამართლოს განჩინების საფუძველზე ჩატარდა და ზემოაღნიშნული მასალა, საპროცესო კანონმდებლობის შესაბამისად, განსაიდუმლოების შემდეგ სხვა მტკიცებულებებთან ერთად, ბრალდების მხარემ 2020 წლის 3 სექტემბერს მხოლოდ დაცვის მხარეს გადასცა“, - განაცხადა დავით ყაზარაშვილმა