„გადმოგცემთ, როგორც რაგბის საუკეთესო დამცველს", - ამ სიტყვებით მორაგბეებმა საქართველოს პრემიერ-მინისტრ გიორგი გახარიას საჩუქრად რაგბის ბურთი გადასცეს, რომელზეც სარაგბო კლუბებისა და საქართველოს რაგბის ეროვნული ნაკრების მორაგბეების ხელმოწერებია. ამის შესახებ „ინტერპრესნიუსს“ საქართველოს მთავრობის ადმინისტრაციიდან აცნობეს.

მათივე ინფორმაციით, სამახსოვრო საჩუქარი პრემიერს მორაგბეებმა მთავრობის ადმინისტრაციაში დღეს გამართული შეხვედრის დასასრულს გადასცეს, რომელზეც ცნობილი გახდა, რომ საქართველოს მთავრობა რაგბის ფედერაციას ფინანსური პრობლემების გადაწყვეტაში დაეხმარება.

გარდა ამისა, გიორგი გახარიამ მორაგეებთან შეხვედრისას აღნიშნა, რომ მთავრობა ყველაფერს აკეთებს, რათა საქართველომ შეძლოს ისტორიული შანსით სარგებლობა და მონაწილეობა მიიღოს რაგბის ყველაზე პრესტიჟულ ტურნირში, ე.წ. შემოდგომის თასზე რაგბიში - „8 ერი", სადაც ევროპული რაგბის 6 საუკეთესო გუნდსა და ფიჯის ეროვნულ ნაკრებთან შეჯიბრების შესაძლებლობა მიეცემა და ამ მიზნით 6 ერის ხელმძღვანელობასთან აქტიურ მოლაპარაკებებს აწარმოებს.