ჩინეთი ინდოელ ჯარისკაცებს სადავო საზღვრის უკანონოდ გადაკვეთასა და „პროვოკაციული“ გასროლის განხორციელებაში ადანაშაულებს, - ამის შესახებ ინფორმაციას „როიტერსი“ ადგილობრივ მედიაზე დაყრდნობით ავრცელებს.

გამოცემა Global Times-ის ცნობით, ინდოელმა ჯარიკაცებმა შენპაოს მთიან რეგიონში უანონოდ გადაკვეთეს „ფაქტობრივი კონტროლის ხაზი“ და გამაფრთხილებელი გასროლა განახორციელეს.

ჩინეთის „ხალხის განმანთავისუფლებელი არმიის“ ოფიციალური წარმომადგენლის ჟანგ შუილის თქმით, ჩინელი მესაზღვრეები იძულებულები გახდნენ, საპასუხო ზომები მიეღოთ, თუმცა მას არ დაუკონკრეტებია, რა ზომებს გულისხმობდა.

აღსანიშნავია, რომ 1996 წელს გაფორმებული ხელშეკრულება „ფაქტობრივი კონტროლის ხაზთან“ იარაღისა და ასაფეთქებელი მოწყობილობების გამოყენებას ორივე ქვეყანას უკრძალავს.

ინდოეთსა და ჩინეთს შორის ურთიერთობა განსაკუთრებით მას შემდეგ დაიძაბა, რაც მიმდინარე წლის ივნისში, ინდოელ და ჩინელ ჯარისკაცებს შორის ჰიმალაის სასაზღვრო რეგიონში მომხდარ შეტაკებას 20 ინდოელი ჯარისკაცის სიცოცხლე ემსხვერპლა. ინციდენტის შემდეგ საზღვრის გასწვრივ ორივე მხარემ დამატებითი ძალები განალაგა.