ბელარუსის ოპოზიციის საკოორდინაციო საბჭოს წევრი მარია კოლესნიკოვა ბელარუსის ხელისუფლებამ მას შემდეგ დააკავა, რაც მან ბელარუსიდან გაძევებისგან თავის დასაღწევად პასპორტი დახია.
მედიის ინფორმაციით, მარია კოლესნიკოვამ პასპორტი გამიზნულად დახია იმისთვის, რომ უკრაინელ მესაზღვრეებს საზღვარზე არ შეეშვათ.
უკრაინის შინაგან საქმეთა მინისტრის მოადგილემ, ანტონ გერაშჩენკომ, სოციალურ ქსელ „ფეისბუქში“ განაცხადა, რომ კოლესნიკოვამ მშობლიური ქვეყნიდან გაძევებას წარმატებით შეუშალა ხელი.
„მარია კოლესნიკოვა ბელარუსიდან ვერ გამოადეპორტეს, იმიტომ, რომ ამ მამაცმა ქალმა საზღვრის გადაკვეთას წარმატებით დაღწია თავი და ბელარუსის ტერიტორიაზე დარჩა. ალექსანდრე ლუკაშენკო მის სიცოცხლესა და ჯანმრთელობაზე პირადადაა პასუხისმგებელი,“- აღნიშნა გერაშჩენკომ.
Reuters-ის ინფორმაციით, ბელარუსის სასაზღვრო სამსახურის წარმომადგენელმა სააგენტოსთან სატელეფონო საუბარში განაცხადა, რომ ამ დროისთვის კოლესნიკოვა დაკავებულია.
„ახლა კოლესნიკოვა დაკავებულია. ზუსტად არ შემიძლია იმის თქმა, სად იმყოფება, მაგრამ დაკავებულია,“- აღნიშნა ანტონ ბიჩკოვსკიმ.