თბილისის სახელმწიფო სამედიცინო უნივერსიტეტის მორიგი საერთაშორისო აღიარება - თსსუ-ის რექტორი, პროფესორი ზურაბ ვადაჭკორია ევროპის სამედიცინო განათლების ასოციაციის საპატიო წევრად აირჩიეს

სამედიცინო განათლების საერთაშორისო ასოციაცია (ტრადიციულად ცნობილი, როგორც ევროპის სამედიცინო განათლების ასოციაცია - AMEE, Association for Medical Education in Europe) მსოფლიოში ყველაზე ავტორიტეტული და წარმომადგენლობითი ორგანიზაციაა, რომლის კოორდინაციით და ხელმძღვანელობით ხორციელდება ყველა მნიშვნელოვანი ინოვაცია სამედიცინო განათლების სფეროში. AMEE ყოველწლიურად ატარებს კონფერენციებს, სადაც განიხილება სამედიცინო განათლებაში ახალი მეთოდოლოგიები, მიღწევები და მომავალი პერსპექტივები.

როგორც „ინტერპრესნიუსს“ თბილისის სახელმწიფო სამედიცინო უნივერსიტეტიდან აცნობეს, 2020 წლის 7-9 სექტემბერს კოვიდ-19-ის პანდემიის გამო AMEE-ს კონფერენცია ვირტუალურ სივრცეში იმართება.

„მიუხედავად უჩვეულო ფორმატისა, კონფერენციაში მონაწილეობას იღებს 3000-ზე მეტი დელეგატი მსოფლიოს 93 ქვეყნიდან. პირველ დღეს კონფერენცია გახსნა AMEE-ს პრეზიდენტმა, პროფესორმა ტრევორ გიბსმა. შესავალი სიტყვის დასასრულს AMEE-ს პრეზიდენტმა განაცხადა, რომ საქართველოში და სამხრეთ კავკასიის რეგიონში სამედიცინო განათლების განვითარებასა და ინოვაციების განხორციელებაში შეტანილი განსაკუთრებული წვლილისთვის თბილისის სახელმწიფო სამედიცინო უნივერისტეტის რექტორი პროფესორი ზურაბ ვადაჭკორია არჩეულია AMEE-ს საპატიო წევრად. პროფესორმა ზურაბ ვადაჭკორიამ საპასუხო სიტყვაში მადლობა გადაუხადა პროფესორ ტრევორ გიბსს მისი მოღვაწეობის ასეთი აღიარებისთვის, ხაზი გაუსვა თბილისის სახელმწიფო სამედიცინო უნივერსიტეტსა და AMEE-ს შორის ტრადიციულ, მრავალწლიან და ნაყოფიერ თანამშრომლობას. ამის ყველაზე თვალსაჩინო გამოხატულება იყო 2019 წელს თბილისის სახელმწიფო სამედიცინო უნივერსიტეტში მსოფლიოში მესამე - რეგიონული მნიშვნელობის AMEE-ს საერთაშორისო თანამშრომლობის ცენტრის გახსნა, სადაც რეგულარულად მიმდინარეობს ტრენინგები სამედიცინო განათლების მეთოდოლოგიაში”, - ნათქვამია ინფორმაციაში.

მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
ემილ ავდალიანი - არაბული ქვეყნებისთვის და ირანისთვის ახლო აღმოსავლეთის რეგიონთან ჩინეთის ურთიერთობის სუფთა წარსული მეტად მიმზიდველია
ქართული პრესის მიმოხილვა 28.03.2024
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს