ფეხბურთელ გიორგი შაქარაშვილის საქმეზე დაკავებული არასრულწლოვნის ზ.ხ.-ს მამა, თამაზ ხომასურიძე გენერალურ პროკურორთან, ირაკლი შოთაძესთან შეხვედრას ითხოვს. აღნიშნულის შესახებ მან ჟურნალისტებს პროკურორებთან შეხვედრის შემდეგ განუცხადა. როგორც ხომასურიძე განმარტავს, მან გიორგი შაქარაშვილის ბიძის, მირიან ნიკოლაძის წინააღმდეგ საჩივარი დაწერა. ახლა ის ჯერ საქმის პროკურორთან, საღამოს კი ირაკლი შოთაძესთან შეხვედრას ითხოვს.

ხომასურიძის განმარტებითვე, მან ორ პროკურორთან შეხვედრაზე კითხვებზე პასუხი ვერ მიიღო.

„მირიან ნიკოლაძეზე საჩივარი დამაწერინეს. თუ საღამოს შოთაძე არ შემხვდება, აქ თავს მოვიკლავ. უკვე მაქვს ისეთი წამალი დალეული, ანტიდოტი თუ არ მივიღე, საღამოს მოვკვდები. შევატყვე, ამ პროკურორებს, რომ ჩემკენ იყვნენ, მაგრძნობინეს რომ მართალი ვარ", - განაცხადა ხომასურიძემ.

ცნობისთვის, თამაზ ხომასურიძემ საქმის პროკურორთან შეხვედრის მოთხოვნით დღეს თავის დაწვა სცადა.