23 წლის გარდაცვლილი პროგრამისტის თამარ ბაჩალიაშვილის დედის თეონა თამაზაშვილის განცხადებით, ხვალ ოჯახი სახალხო დამცველის აპარატის წარმომადგენელს შეხვდება.
თამაზაშვილის თქმით, პირადად მისი მოთხოვნა იყო, რომ თუ საქმეში FBI-ს გამომძიებლების ჩართვა ვერ ხერხდებოდა, მათი ექსპერტები ჩართულიყვნენ, რათა ექსპერტიზა ბოლომდე მიეყვანათ.
"სახალხო დამცველის აპარატის წარმომადგენელმა წერილობით გამოითხოვა საქმის მასალები, ჩვენ მათ ხვალ შევხვდებით, საქმეში იქნებიან უშუალოდ ჩართულები და გაეცნობიან მასალებს.
პირადად ჩემი მოთხოვნა იყო, რომ რადგან FBI-ს გამომძიებლების ჩართვა არ შეიძლება, იქნებ მათი ექსპერტები მაინც ჩაერთონ ამ ექსპერტიზის დასასრულებლად. ამ საკითხთან დაკავშირებით მიხეილ რამიშვილმა ხვალ უნდა დააყენოს შუამდგომლობა და შემდეგ გაგვცემენ პასუხს”, - აღნიშნა თეონა თამაზაშვილმა.
ცნობისთვის, თამარ ბაჩალიაშვილი 18 ივლისს გაუჩინარდა. ის 5-დღიანი ძებნის შემდეგ თეთრიწყაროს ტყესთან, საკუთარ მანქანაში გარდაცვლილი იპოვეს. ბაჩალიაშვილის საქმეზე გამოძიება თავისუფლების უკანონო აღკვეთის მუხლით დაიწყო, შემდეგ კი ბრალდების კვალიფიკაციას თვითმკვლელობამდე მიყვანის მუხლი დაემატა.