„ადამიანის უფლებათა ცენტრის“ იურისტი - ჯერ კიდევ არ არის მოსული საბოლოო ექსპერტიზა, არაა განსაზღვრული, რამ გამოიწვია თამარ ბაჩალიაშვილის სიკვდილის დადგომა

ძნელი წარმოსადგენია, აქამდე როგორ საუბრობს საგამოძიებო ორგანოს ნებისმიერი წარმომადგენელი ან თანამდებობის პირი სიკვდილის გამომწვევ რაიმე მიზეზზე, როდესაც, თურმე, ჯერ კიდევ არ არის მოსული საბოლოო სამედიცინო ექსპერტიზა , - ამის შესახებ „ადამიანის უფლებათა ცენტრის“ იურისტმა ეკა ქობესაშვილმა თამარ ბაჩალიაშვილის საქმეზე თბილისის პროკურატურაში გამართული შეხვედრის შემდეგ ჟურნალისტებს განუცხადა.

მისი თქმით, ამერიკის შეერთებულ შტატებში გაგზავნილია მოთხოვნა თამარ ბაჩალიაშვილის კომპიუტერიდან და ტელეფონიდან წაშლილი ინფორმაციის აღდგენის თაობაზე. ამასთან, როგორც ქობესაშვილი აცხადებს, საგამოძიებო უწყებაში დაუდასტურეს, რომ სამართალდამცველები არა მხოლოდ თვითმკვლელობის, არამედ ყველა ვერსიაზე მუშაობენ.

„შევხვდით საგამოძიებო სამსახურის ხელმძღვანელებს, თანამშრომლებს, ვინც იძიებს ამ საქმეს, იმ გამომძიებელს. მოხდა გარკვეული საკითხების დაზუსტება. საგამოძიებო ორგანომ კიდევ ერთხელ მოისმინა ოჯახის შეფასება და მოთხოვნა ამ საქმესთან დაკავშირებით. ასევე, ადვოკატთან ერთად გავეცანი საქმის მასალებს, კერძოდ, ექსპერტიზის დანიშვნის დადგენილებებს და ექსპერტიზს დასკვნებს. ჩემთვის ძალიან ძნელი წარმოსადგენია, აქამდე როგორ საუბრობს საგამოძიებო ორგანოს ნებისმიერი წარმოამდგენელი ან თანამდებობის პირი სიკვდილის გამომწვევ რაიმე მიზეზზე, როდესაც ჯერ კიდევ, თურმე არ არის მოსული საბოლოო სამედიცინო ექსპერტიზა. არ არის განსაზღვრული, რამ გამოიწვია თამარ ბაჩალიაშვილის სიკვდილის დადგომა, ან არის თუ არა მის სხეულზე რაიმე დაზიანება.

ასევე, ჩვენ ველოდებით ამერიკიდან „ფეისბუქზე“ და კომპიუტერზე წაშლილი ინფორმაციის აღდგენას. მოგეხსენებათ, ბაჩალიაშვილის კომპიუტერიდან და ტელეფონიდან წაშლილია გარკვეული ინფორმაცია, ზუსტად ამ ინფორმაციის აღდგენას ვითხოვთ, გამოძიებასაც აქვს წერილი გაგზავნილი. სამედიცინო ექსპერტიზის დასკვნისა და ამ წერილზე პასუხის მიღების შემდეგ გარკვეული სურათი შეიძლება შეიქმნას, აღნიშნულ საქმესთან დაკავშირებით, რამ გამოიწვია ბაჩალიაშვილის სიკვდილი“, - განაცხადა ეკა ქობესაშვილმა.

ემილ ავდალიანი - სამხრეთ კავკასიის რეგიონმა დიდი ძალების მეტოქეობის ხანაში შეაბიჯა, დღეს თამაშის ახალი წესები ყალიბდება,  მტკივნეული და გარდამავალი პერიოდია
ქართული პრესის მიმოხილვა 12.04.2021
როგორ ჩატარდება ერთიანი ეროვნული გამოცდები? - შარშანდელ რეკომენდაციებში შესაძლოა, კორექტირება შევიდეს - ინტერვიუ სოფიო გორგოძესთან
გიორგი კეკელიძის ახალი ინიციატივა: აპრილი წიგნის ჩუქების თვედ გამოცხადდეს
ვასილ ხოდელი - ლიბერთის ნებისმიერი სესხი გაიცემა საბაზრო პირობებით