თამარ გაბუნია - თუ ბოლო ორი კვირის განმავლობაში ჯამურად კორონავირუსის 370 შემთხვევა გვექნება, „მწვანე ზონაში“ დავრჩებით

თუ ბოლო ორი კვირის განმავლობაში ჩვენ ჯამურად გვექნება 370 შემთხვევა და დავრჩებით „მწვანე ზონაში“, - ამის შესახებ „პალიტრანიუსის“ გადაცემა „360 გრადუსში“ ჯანდაცვის მინისტრის მოადგილემ თამარ გაბუნიამ კორონავირუსის ეპიდემიაზე საუბრისას განაცხადა.

როგორც გაბუნიამ აღნიშნა, თუ შემთხვევების რაოდენობა 100 ათას მოსახლეზე 1100-სს გადააჭარბებს ქვეყანა „წითელ“ ზონაში გადავა, რაც გამაფრთხილებელი სიგნალი იქნება ჯანდაცვის სისტემისთვის, რომ მას მეტი მობილიზება მართებს და უნდა გაათავისუფლოს საწოლები პაციენტების მისაღებად.

„ის რასაც დღეს ვაკვირდებით იყო ლოგიკური დასასრული იმ რელაქსირებული და მოშვებული ზაფხულის, რომელიც გავიარეთ. მოულოდნელი ეს ნამდვილად არ იყო. მობილობა გაიზარდა, შემთხვევები სეზონის დასასრულს გამოჩნდა. ეს ჩვეულებრივი მოვლენაა ამ ეპიდემიის მიმდინარეობის პროცესში. დღეს მეტი ბერკეტი გვაქვს, რომ შემთხვევებზე შესაფერისი პასუხი გვქონდეს და მობილობის შეზღუდვის აზრიც აღარ არის. უნდა დავუბრუნდეთ ეკონომიკურ და სოციალურ აქტივობას. ჩვენ ვაკეთებთ ეპიდემიოლოგიურ მოდელირებას. ერთ 45 შემთხვევა არაფერს არ ნიშნავს ეპიდემიოლოგებისთვის.

ბოლო ორი კვირის განმავლობაში თუ ჩვენ ჯამურად გვექნება 370 შემთხვევა და დავრჩებით ამ შუალედში, ეს არის კიდევ „მწვანე ზონა“. ანუ ეს არის ახალი ინცინდენტობის მაჩვენებელი 10, 100 ათას მოსახლეზე. თუ ეს გადავიდა 10-დან 30-მდე, ანუ გადააჭარბა 370-ს და მივიდა 1100-მდე ეს არის „ყვითელი“ და ამის შემდეგ არის „წითელი“. მაგრამ „წითელი“ იმას არ ნიშნავს, რომ რაღაც მეორე ტალღა დაიწყო და მძიმე მდგომარეობაში ვართ.

„წითელი“ არის გამაფრთხილებელი სიგნალი ჯანდაცვის სისტემისთვის, რომ მას მეტი მობილიზება მართებს და უნდა გაათავისუფლოს საწოლები პაციენტების მისაღებად. აპრილში ჩვენ გვქონდა ძალიან დიდი შიში იმის, რომ მძიმე შემთხვევები იქნებოდა ბევრი და ეს დამთავრდებოდა ცუდად როგორც ამის გამოცდილება ჰქონდა იტალიას, ესპანეთს და ბევრ სხვა ქვეყანას, სადაც უკიდურესად მაღალი ლეტალობა იყო. არცერთ მსგავს ეპიდემიას, რომელიც ბოლო პერიოდში იყო, ასეთი დიდი ლეტალობა არ ჰქონდა. მაშინ თითოეული გამოვლენილი შემთხვევა ქვეყნის დასასრული იყო და ვცდილობდით მაქსიმალურად თავიდან აგვეცილებინა, არც კლინიკური გამოცდილება და ცოდნა იყო, როგორ უნდა გვემართა ეს შემთხვევები. დღეს ეს ეტაპი გავიარეთ, მეტი თავდაჯერებით და მომზადებულები ვხვდებით“, - განაცხადა გაბუნიამ.

როგორც ჯანდაცვის მინისტრის მოადგილემ განმარტა, ზაფხულის სეზონიდან გამომდინარე, კორონავირუსის შემთხვევები ახალგაზრდებში მეტად გამოვლინდა და ზოგ შემთხვევაში საერთოდ სიმპტომების გარეშეა.

„როდესაც ზაფხულის შემთხვევების რაოდენობის მატებასთან გვაქვს საქმე, დამსვენებლებს შორის მეტი იყო ახალგაზრდა ასაკის ადამიანები, ამდენად, ახალგაზრდებში ვიცით, რომ ვირუსის მიმდინარეობა შედარებით მსუბუქია. ქრონიკული პაციენტი არც გასართობად დადის ღამის კლუბში და არც დიდ სოციალური თავშეყრის ადგილებში. ამდენად, ჩვენი კოჰორტა, რაც ახლა ჩამოყალიბდა მეტად ახალგაზრდაა და ბევრი საერთოდ სიმპტომების გარეშეა“, - განაცხადა გაბუნიამ.

ტოომას ჰენდრიკ ილვესი - არ გჭირდებათ ევროკავშირის დროშების ყველგან აღმართვა, თუ მის ღირებულებებს არ იზიარებთ - სიტყვების თქმით: ”ჩვენ ევროპელები ვართ“, ევროკავშირში ავტომატურად ვერ შეხვალთ
ქართული პრესის მიმოხილვა 09.04.2021
ლევან დოლიძე - რაც უფრო დიდხანს გაგრძელდება ვაშინგტონსა და ბრიუსელში ჩვენს შიდა პრობლემებზე მსჯელობა, მით უფრო გაგვიჭირდება მათთან იმ საკითხებზე საუბარი, რასაც ქვეყნის ინტერესები მოითხოვს
ბექა ნაცვლიშვილი - როგორც ჩანს, "ქართული ოცნება“ ემზადება მოლაპარაკების მესამე რაუნდისთვის და აგრძელებს კომუნიკაციას ევროკავშირთან, ამის შედეგი კი იქნება ის, თუ რა მოხდება მელიას გადადებულ სასამართლოზე
კახა ოქრიაშვილი - 15 მაისის აქციის სამზადისში აქტიურად ვარ ჩართული
ხარისხი გარანტირებულია: "კარფური" „მასტერშეფის“ ახალი სეზონის გენერალური სპონსორი და მხარდამჭერი გახდა