სკანდინავიისა და ბალტიის რეგიონის ქვეყნების საგარეო საქმეთა მინისტრები ბელარუსისთვის მიმდინარე კვირაში სანქციების დაწესებას და პოლიტპატიმრების დაუყოვნებლივ გათავისუფლებას მოითხოვენ. ტალინში ნორდიკულ-ბალტიური რვიანის (NB8) შეხვედრა გაიმართა, რომელიც არის რეგიონული თანამშრომლობის არაფორმალური ფორმატი ბალტიის - ლიტვა, ლატვია, ესტონეთი და ნორდიკულ - შვედეთი, ფინეთი, ნორვეგია, ისლანდია, დანია, ქვეყნებს შორის.

შეხვედრისას ესტონეთის საგარეო საქმეთა მინისტრმა ურმას რეინსალუმ განაცხადა, რომ მინისტრებმა ბელარუსში არსებული კრიზისი განიხილეს და ყველა ქვეყანამ სანქციების დაწესების იდეას მხარი დაუჭირა, ასევე ყველა მხარე თანხმდება, რომ ევროპამ კრიზისთან მიმართებაში სრული რეაგირება უნდა მოახდინოს.

„სრულ სოლიდარობას ვუცხადებთ ბელარუსში მყოფ ხალხს და ვფიქრობ, რომ ახლა მოქმედების დროა. დღევანდელ ერთობლივ შეხვედრაზე გაჩნდა ერთიანი, ქვეყნების მიერ მხარდაჭერილი იდეა, რომ ამ კვირაში უნდა წარვადგინოთ სანქციები. ვითარება არის ის, რომ ლუკაშენკო ამძაფრებს სიტუაციას, აპატიმრებს და იტაცებს ხალხს, პოლიტიკურ ოპონენტებს და ეს არის ის, რასაც ევროპამ სრულად უნდა უპასუხოს“, - განაცხადა რეინსალუმ.