დაავადებათა კონტროლის ეროვნული ცენტრის ხელმძღვანელის ამირან გამყრელიძის განცხადებით, დღევანდელი ეპიდვითარება კონტროლირებადია.
მისივე თქმით, „სამედიცინო სფეროს და საზოგადოებრივ ჯანდაცვას პულსზე ხელი კარგად უჭირავს“.
„მიუხედავად იმასა, რომ ქვეყანაში გვაქვს კორონავირუსის ახალი შემთხვევების ზრდა, სიტუაცია სრულად კონტროლირებადია. სამედიცინო სფეროს და საზოგადოებრივ ჯანდაცვას კარგად გვიჭირავს პულსზე ხელი და ყველა ახალი შემთხვევის კონტაქტს მივდევთ, ადვილად ვაკეთებთ მის იდენტიფიცირებას და შემდგომ იზოლირებას თუ კარანტინს“, - განაცხადა გამყრელიძემ.
როგორც ამირან გამყრელიძემ აღნიშნა, მოსახლეობის მხარდაჭერა და რეკომენდაციების სრულად დაცვა აუცილებელია.
„მოსახლეობის მხარდაჭერა აუცილებელია. ერთის მხრივ ამ შემთხვევებმა არ უნდა დათესონ პანიკა მოსახლეობაში, იმიტომ, რომ ეს ყველაფერი მართვადია, მაგრამ უნდა გავითავისოთ, რომ ძალიან საყურადღებოა შემთხვევების ამ ტიპის ზრდა. სახელმწიფომ, ექიმებმა და მოსახლეობამ ერთად უნდა შევასრულოთ ის რეკომენდაციები, რომლებსაც ყოველდღიურად ვაჟღერებთ. შეიძლება თავი მოგაბეზრეთ ერთი და იგივეს ლაპარაკით, მაგრამ ეს აუცილებელია“, - განაცხადა ამირან გამყრელიძემ.