საქართველოს პარლამენტის თავმჯდომარის არჩილ თალაკვაძის განცხადებით, მათი მიზანია, რაც შეიძლება მეტმა საერთაშორისო პარტნიორმა ნახოს არჩევნების გამჭვირვალობა, რის გამოც, დღეს წერილობით მიმართა ევროპარლამენტის პრეზიდენტს, ასევე ევროსაბჭოს საპარალმენტო ასამბლეის პრეზიდენტს, რომ მხარი დაუჭირონ საქართველოში სადამკვირვებლო მისიების გამოგზავნას.

თალაკვაძის თქმით, საქართველოში ჩამოსული უცხოელი დამკვირვებლები უწყვეტ რეჟიმში შეძლებენ საარჩევნო კამპანიაზე და არჩევნების პროცესზე დაკვირვებას.

„ჩვენ გავატარეთ მნიშვნელოვანი დემოკრატიული რეფორმები და საქართველო მზად არის, არსებითად პროპორციული სისტემით ჩაატაროს საპარლამენტო არჩევნები. ჩვენი მიზანი არის, რაც შეიძლება მეტმა საერთაშორისო პარტნიორმა ნახოს ჩვენი არჩევნების გამჭვირვალობა და სამართლიანობა, სწორედ ამიტომ, დღეს წერილობით მივმართე ევროპარლამენტის პრეზიდენტს, ასევე ევროსაბჭოს საპარალმენტო ასამბლეის პრეზიდენტს, რომ მხარი დაუჭირონ საქართველოში სადამკვირვებლო მისიების გამოგზავნას, ჩვენ ვუზრუნველყოფთ მაქსიმალურ უსაფრთხოებას დამკვირვებელთათვის, ამისთვის შევიტანეთ კანონში ცვლილებები. როგორც ჯანდაცვის სამსახურს, ასევე საარჩევნო ადმინისტრაციას სრული უფლებამოსილება მიეცათ იმისთვის, რომ მათ სათანადო ზომები მიიღონ დამკვირვებელთა უსაფრთხოებისთვის. დამკვირვებლებს არცერთი დღე ხელი არ შეეშლებათ, როდესაც ისინი საქართველოში ჩამოვლენ, უწყვეტ რეჟიმში შეძლებენ საარჩევნო კამპანიაზე და არჩევნების პროცესზე დაკვირვებას.

ჩვენ სათანადო ზომები მიღებული გვაქვს და რა თქმა უნდა, არჩევნების დღესაც უსაფრთხოების ზომები დამატებით იქნება დაცული.

გვსურს, ჩვენს მოქალაქებს და საერთაშორისო მეგობრებს ვაჩვენოთ, რომ საქართველო აძლიერებს თავის დემოკრატიას და ეს საპარლამენტო არჩევნები იქნება კიდევ უფრო მეტი წინსვლა საქარველოში დემოკრატიული განვითარების თვალსაზრისით“,-განაცხადა თალაკვაძემ.