აშშ-ში ტყის ხანძრებისგან დაღუპულთა რაოდენობა 23-მდე გაიზარდა, - ამის შესახებ ინფორმაციას Usatoday-ი ავრცელებს.
გამოცემის ცნობით, წელს ხანძარს 19 ადამიანი კალიფორნიის შტატში ემსხვერპლა, 3 - ორეგონში, ვაშინგტონში კი 1 წლის ბავშვი დაიღუპა, რომლის მშობლებსაც ძლიერი დამწვრობა აქვთ მიღებული.
ორეგონის ხელისუფლება აცხადებს, რომ სტიქიის გამო 500 000 ადამიანის ევაკუაცია განახორციელეს, რაც შტატის მოსახლეობის მთლიანი რაოდენობის 10 %-ს შეადგენს.
მდგომარეობას უჩვეულო ქარიც ართულებს. ამინდის ეროვნული სამსახურის ინფორმაციით, უახლოეს დღეებში ქარის შესუსტებაა მოსალოდნელი.
წელს კალიფორნიაში ტყის ხანძრებისგან 12 546 კვადრატული კილომეტრი ტერიტორია დაიწვა. შტატის ისტორიაში 20 უდიდესი ხანძარიდან 6 მიმდინარე წელს მოხდა.
აშშ-ის 12 შტატში ამჟამად ხანძრის 100-ზე მეტ კერას ებრძვიან.