იმის მაგივრად, რომ დღეს უმთავრეს გამოწვევად გამოცხადდეს დაქცეული ეკონომიკა, გაღარიბებული მოსახლეობა, „ოცნების“ მთავრობა მთავარ გამოწვევად ისევ „ ნაციონალების“ დამარცხებას მიიჩნევს და კოვიდზე გამარჯვებაზე გვესაუბრება. ველოდები როდის გამოგვიცხადებენ საკრალურ 100 რიცხვს და მერე ჩაგვკეტავენ კიდეც, - ამის შესახებ პოლიტიკური მოძრაობა „ტრიბუნას“ ლიდერმა დავით ჭიჭინაძემ განაცხადა.
ჭიჭინაძე მიიჩნევს, რომ „ოცნება“ არაფრის შეცვლას არ აპირებს. „ბიძინა ივანიშვილმა გამოგვიცხადა, რომ უკვე ძალიან წარმატებულ და ბედნიერ ქვეყანაში ვცხოვრობთ . ამით უკვე ყველაფერი ნათქვამია. ამიტომ, მნიშვნელობა აღარ აქვს ოცეულს წარმოგვიდგენენ, თუ ასეულს, ფაქტია ივანიშვილი არაფრის შეცვლას არ აპირებს. მისი ბოლო განცხადების შემდეგ კი, შთაბეჭდილება იგივე იყო, რაც ტიკ- ტოკის ნახვის შემდეგ - ის ამ ქვეყანაში არ იმყოფება! ამას გარდა, უმთავრესი, როდესაც ქვეყანაში სიტუაცია კიდევ უფრო მძიმდება, ხდება ფორსმაჟორული და როდესაც კოვიდის ასეთი შემოტევა გვაქვს, მაინტერესებს როდის შეივსება კოვიდ 19-ის ფონდი, სადაც მილიონობით ლარი იყო მობილიზებული, რომელიც მთავრობამ, პარტია „ქართული ოცნების“ სახელით, სხვადასხვა სოციალური პროგრამების დასაფინანსებლად გამოიყენა და ახლა სრულიად გამოცარიელებულია?!“, - განაცხადა დავით ჭიჭინაძემ.