„ნაციონალური მოძრაობის" ერთ-ერთი ლიდერი თინა ბოკუჩავა NDI-ის კვლევას აფასებს და დასძენს, რომ ადამიანების უმეტესი ნაწილი ოპოზიციურადაა განწყობილი. მისი თქმით, იმ ადამიანებს, ვისაც ჯერ გადაწყვეტილი არ აქვთ, თუ ვის მისცემენ არჩევნებზე ხმას, შესაძლოა, მხარი ოპოზიციას დაუჭირონ.

„ორი რადიკალურად განსხვავებული კვლევის შედეგია და ამისთვის არსებობს ერთი მარტივი მიზეზი. ეს მარტივი მიზეზი არის ის, რომ NDI არის მაღალი რეპუტაციის მქონე, სანდო ორგანიზაცია, რომელიც სანდო კვლევებს აქვეყნებს და მეორე არის „ქართული ოცნების" პროპაგანდისტული მანქანის - „იმედის" დაკვეთით შესრულებული კვლევა, რომელსაც გააჩნია ნული სანდოობა. ვხედავთ, რომ ადამიანების უმეტესი ნაწილი ოპოზიციურადაა განწყობილი, შესაბამისად, ბევრი მათგანი ღიად არ აცხადებს საკუთარ პოლიტიკურ გემოვნებას ამა თუ იმ კვლევაში, ეს აისახება სწორედ იმაში, რომ მოსახლეობის 59 პროცენტი, NDI-ის სანდო, კვალიფიციური კვლევის მიხედვით ამბობს, რომ მას არ აქვს გადაწყვეტილი, ვის მისცემს არჩევნებზე ხმას.

დარწმუნებული ვარ, რომ არჩევნებზე ეს 59 პროცენტი გადაითარგმნება ოპოზიციისთვის სასარგებლო ხმებში და ეს მოიყვანს ამ ხელისუფლების ცვლილებას",-აცხადებს ბოკუჩავა.

ცნობისთვის, NDI-ის კვლევით, მოსახლეობის უმეტესობა ოქტომბრის საპარლამენტო არჩევნებში მონაწილეობას აპირებს (88%), თუმცა ჯერ კიდევ არ აქვს გადაწყვეტილი თუ ვის მისცემს ხმას (59 %).