ეს არის ტესტი გახარიასთვის - ის ან არის ღია ადამიანი, რომელსაც არ ეშინია დებატების, როგორც ეს დასავლურ ცივილიზაციებშია, ან ის არის ჩვეულებრივი რუსული მენტალობის ადამიანი, კარგი კავშირები აქვს რუსეთთან, სადაც დებატები პუტინთან არასდროს ყოფილა - მარტივი არჩევანია , - ამის შესახებ „სტრატეგია აღმაშენებლის“ ლიდერმა გიორგი ვაშაძემ ტელეკომპანია „პალიტრანიუსის“ გადაცემა „დღის ნიუსრუმში“ განაცხადა.
ვაშაძე იმედოვნებს, რომ გიორგი გახარია „არ დაფრთხება და დებატების არ შეეშინდება“.
„ველოდები პასუხს ბატონი გახარიასგან. დაემალება ის ხალხთან საჯარო საუბარს და დებატებს პრემიერ-მინისტრობის სხვა კანდიდატთან, თუ არ შეეშინდება და გამოვა და ვისაუბრებთ ყველა საკითხზე“, - განაცხადა ვაშაძემ.
ამასთან, როგორც ის აღნიშნავს, მაჟორიტარულ ოლქებში დებატებზე გაცილებით მნიშვნელოვანი ქვეყნის განვითარების გეგმაზე დებატებია.
„პრემიერ-მინისტრობის კანდიდატი ვარ. ყველაზე მზარდი მხარდაჭერის მქონე პოლიტიკური პარტიის. კვლევებში ოპოზიციური ამომრჩეველის უმრავლესობა სწორედ მე და ჩემს გუნდს გვიჭერს მხარს. ვართ კონკრეტული გეგმით და სტრატეგიით. მაჟორიტარულ ოლქებში დებატებზე გაცილებით მნიშვნელოვანია დებატები ქვეყნის განვითარების გეგმაზე, სტრატეგიაზე მსჯელობა და ამიტომ მე მაინტერესებს მისი პასუხები, რატომ არ შეასრულეს არცერთი დაპირება 8 წლის განმავლობაში. მე მაინტერესებს, ისევ აპირებენ რომ ხალხი მოატყუონ? რა იცვლება მასში?“,- განაცხდა ვაშაძემ.