ძალიან ნათლად გამოიკვეთა ის წითელი ხაზები, რომლებიც არ უნდა გადაკვეთოს ხელისუფლებამ , - ასე ეხმაურება ეუთოს საპარლამენტო ასამბლეის პრეზიდენტი, „ევროპული საქართველოს“ მაჟორიტარობის კანდიდატი ტყიბულის, თერჯოლის, ზესტაფონისა და ბაღდათის ოლქში, გიგი წერეთელი ევროპარლამენტარების განცხადებებს.

გიგი წერეთლის თქმით, ევროპარლამენტარებმა გამოთქვეს ყველა ის წუხილი, რაც არჩევნების წინ აქვთ. წერეთელმა აღნიშნა, რომ ამ არჩევნების ჩატარება მნიშვნელოვნად განსაზღვრავს საქართველოს ურთიერთობას დასავლელ პარტნიორებთან.

„ძალიან ნათლად გამოიკვეთა ის წითელი ხაზები, რომელიც არ უნდა გადაკვეთოს ხელისუფლებამ, პირველ რიგში, ეს არის ადმინისტრაციული რესურსის გამოყენება არასწორად, ძალადობა, ამომრჩევლების მოსყიდვა და რამენაირად არჩევნების გაყალბების მცდელობა და მათ მკაფიოდ აღნიშნეს, რომ ის შეთანხმებები, რომლებიც დაიდო, უნდა შესრულდეს. მთლიანობაში, ის თუ როგორ ჩატარდება ეს არჩევნები მნიშვნელოვნად განსაზღვრავს ჩვენ ურთიერთობას დასავლელ პარტნიორებთან“, - განაცხადა გიგი წერეთელმა, რომლის კომენტრსაც "ევროპული საქართველოს" პრესსამსახური ავრცელებს.

ცნობისთვის, ევროპარლამენტში გამართული დებატებზე საქართველოს მიერ ევროკავშირთან გაფორმებული ასოცირების შეთანხმების იმპლემენტაციის შესახებ ანგარიში განიხილეს.