საბერძნეთის პოლიციამ კუნძულ ლესბოსზე მდებარე უდიდეს ბანაკ „მორიაში“ გაჩენილი ხანძრის საქმის გამოძების ფარგლებში 5 მიგრანტი დააკავა, კიდევ ერთს კი ეძებენ. ამის შესახებ საბერძნეთის სამოქალაქო დაცვის მინისტრმა განაცხადა.

„მორიას“ ბანაკში ხანძრის გაჩენაში მონაწილეები წინასწარ პატიმრობაში იმყოფებიან. ისინი არიან 5 ახალგაზრდა უცხოელი. ჩვენ კიდევ ერთ მათგანს ვეძებთ“, - აღნიშნა მინისტრმა.

„როიტერის“ ინფორმაციით, საბერძნეთის ხელისუფლება დარწმუნებულია, რომ ხანძარი განზრახ გააჩინეს ბანაკის იმ მცხოვრებლებმა, რომლებიც კორონავირუსის გამო დაწესებულ საკარანტინე ზომებს ეწინააღმდეგებოდნენ.

შეგახსენებთ, საბერძნეთის კუნძულ ლესბოსზე მიგრანტთა უდიდესი ბანაკი „მორია“ რამდენიმე დღის წინ დაიწვა, რის შედეგადაც 12 000-ზე მეტი ლტოლვილი თავშესაფრის გარეშე დარჩა.