დღეს “ლელომ“ ქალთა საბჭოს მთაწმინდის რაიონის 12 ქალი წევრი წარადგინა. ღონისძიებას „ლელოს” პოლიტსაბჭოს წევრი მედეა მეტრეველი და მთაწმინდა-კრწანისის ოლქის მაჟორიტარი დეპუტატობის კანდიდატი საბა ბუაძე დაესწრნენ. ამის შესახებ „ინტერპრესნიუსს“ პოლიტიკური მოძრაობა „ლელო საქართველოსთვის“ პრესსამსახურიდან აცნობეს.

„ლელოს” პოლიტსაბჭოს წევრის, მედეა მეტრეველის თქმით, პარტია პოლიტიკურ და საზოგადოებრივ საქმიანობაში ქალების როლის გაძლიერებაზე განსაკუთრებით ამახვილებს ყურადღებას , სწორედ ამიტომ “ლელო” ქალების აქტიურობას უწყობს ხელს.

“დღევანდელი ღონისძიება დასაწყისია ქალების წინაშე არსებული პრობლემების გადაჭრისა და გენდერული თანასწორობის უმთავრესი პრინციპების განმტკიცების. ქალების საზოგადოებრივ-პოლიტიკურ ცხოვრებაში გააქტიურება ხელს შეუწყობს ისეთი სახელმწფო პოლიტიკის წარმოებას, რომელიც უფრო მეტად იქნება ორიენტირებული ცხოვრების ხარისხის გაუმჯობესებაზე, ოჯახების წინაშე არსებული პრიორიტეტების გამოკვეთაზე, ჩვენი შვილების უსაფრთხო და ჯანსაღ გარემოში ცხოვრების უზრუნველყოფაზე, ქვეყანაში სტაბილურობისა და მშვიდობის შენარჩუნებაზე, განათლებასა და ინფრასტრუქტურული პრობლემების ეფექტურ მოგვარებაზე. „ლელოს“ ქალთა საბჭოს წევრების წარდგენა მთელი საქართველოს მასშტაბით იგეგმება. პარტიამ უკვე წარადგინა „ლელოს“ ქალთა საბჭოს წევრები ისნის რაიონსა და საქართველოს რამდენიმე რეგიონში,”- განცხადა მედეა მეტრეველმა.

“ლელოს” მთაწმინდა-კრწანისის მაჟორიტარი დეპუტატობის კანდიდატის საბა ბუაძის განცხადებით, საქართველოში ქალების ერთ-ერთი მთავარი პრობლემა არის მათი ეკონომიკური თავისუფლება.

“ჩვენ ხელი უნდა შევუწყოთ ქალების ეკონომიკურად გაძლიერებას, რადგან ამის უკან დგას სხვა ყველა საკითხი. ეკონომიკური პრობლემები მათ დაბრკოლებას უქმნის ყოველდღიურ ცხოვრებაში. ჩვენ მათ წარმატებას უნდა შევუწყოთ ხელი და მჯერა, რომ “ლელო” ამას მოახერხებს”, - განაცხადა საბა ბუაძემ.

პარტიის ინფორმაციით, “ლელოს” ქალთა საბჭოს მთაწმინდის რაიონის 12 ქალი წევრია ნანა მშვენიერაძე, მანანა აბულაძე, ნინო მამარდაშვილი, ცირა გოგუაძე, მაია გეგეჭკორი, მანანა ჯიქია, მარიამ კანდელაკი, თინათინ ფათრეკაშვილი, ლია ანდრიაშვილი, ნინო ბიჭაშვილი, ანი ყაჭეიშვილი და ლალი ქევხიშვილი.