მთავრობის სხდომაზე თბილისის ბოტანიკური ბაღის 2021-2030 წლების სტრატეგიული განვითარების გეგმას დაამტკიცებენ, - ამის შესახებ თბილისის მერმა კახა კალაძემ დღეს დედაქალაქის მთავრობის სხდომაზე განაცხადა.
კალაძემ აღნიშნა, რომ ამ ტიპის დოკუმენტის დამტკიცება პირველად ხდება.
„თბილისის ბოტანიკური ბაღის 2021-2030 წლების სტრატეგიული განვითარების გეგმის დამტკიცება მოხდება დღეს მთავრობის სხდომაზე, რაც ძალიან მნიშვნელოვანია. ლანდშაფტის განვითარების გეგმა წარმოადგენს ბოტანიკური ბაღის ინფრასტრუქტურისა და კოლექციების სივრცითი განვითარების კონცეპტუალურ დოკუმენტს. ლანდშაფტის გეგმა ეფუძნება ბაღის, როგორც კულტურული მემკვიდრეობის ძეგლის დაცვის პრინციპებს და ამავდროულად, ბოტანიკურ ბაღს აძლევს იმის შესაძლებლობას, რომ ახალ თანამედროვე გამოწვევებს ღირსეულად უპასუხოს. ასეთი დოკუმენტი საერთოდ არ დამტკიცებულა და პირველად ხდება ამ ტიპის დოკუმენტის დამტკიცება“, - განაცხადა კალაძემ.
მისივე თქმით, ბოტანიკური ბაღის განვითარება ძალიან მნიშვნელოვანია თბილისისთვის.