„ოდეერების“ თემა საბჭოთა კავშირის გადმონათში და „ნაციონალური მოძრაობის“ ერთ-ერთი „ნათელი“ სახე იყო,-ასე აფასებს თბილისის მერი კახა კალაძე სამინისტროებსა და სსიპ-ებში ხელშეკრულებით დასაქმების პრაქტიკასთან დაკავშირებით IDFI-ის კვლევას.

კალაძის თქმით, ხელისუფლებამ ე.წ. ოდეერები 2012 წლის არჩევნებზე წარსულს ჩააბარა და დღეს ისინი აღარ არიან.

„ოდეერების“ თემა საბჭოთა კავშირის გადმონათში და „ნაციონალური მოძრაობის“ ერთ-ერთი „ნათელი“ სახე იყო, გვახსოვს ყველას. ჩვენ ეს ყველაფერი „ნაციონალურ მოძრაობასთან“ ერთად 2012 წლის არჩევნებზე წარსულს ჩავაბარეთ. რა თქმა უნდა, რეფორმის, განახლების პროცესი გაგრძელდა. ის, რომ დღეს „ოდეერები“ შესაბამის უწყებებში არ არიან, ეს ძალიან მნიშვნელოვანია“,-განაცხადა კალაძემ.

ცნობისთვის, IDFI-ის კვლევის შედეგებით, ბიუროკრატიული აპარატის მნიშვნელოვან გამოწვევად კვლავ რჩება საჯარო დაწესებულებებში თანამშრომლების ხელშეკრულებით დასაქმების არსებული პრაქტიკა. კერძოდ, გამარტივებული კონკურსის პირობებში, ხელშეკრულებით დასაქმებული თანამშრომლების ფუნქცია-მოვალეობების ბუნდოვანება და მსგავს პოზიციებზე მნიშვნელოვნად განსხვავებული შრომის ანაზღაურების პრაქტიკა. მათი შეფასებით, ეს მნიშვნელოვნად ზრდის ნეპოტიზმისა და საბიუჯეტო სახსრების არარაციონალური განკარგვის რისკებს.