საქართველოს განათლების ყოფილი მინისტრის თამარ სანიკიძის განცხადებით, პანდემიამ გამოწვევის წინაშე ბევრი ქვეყნის განათლების სისტემა დააყენა და გამონაკლისი არც საქართველოა.
"პალიტრანიუსის" გადაცემაში "აქტუალური თემა" ყოფილმა მინისტრმა ისაუბრა მინისტრის როლზე საზოგადოების ინფორმირების კუთხით და აღნიშნა, რომ საზოგადოებასთან ურთიერთობის დროს, კომპეტენციის ფარგლებში, ყველამ თავისი პასუხისმგებლობა უნდა აიღოს.
ყოფილი მინისტრის შეფასებით, აღნიშნული არ ნიშნავს, რომ მინისტრმა უნდა ისაუბროს ყოველთვის და ყველაფერზე .
მისივე თქმით, ამ მიმართულებით, სამინისტროში არსებობენ შესაბამისი მიმართულების ხელმძღვანელები, მოადგილეები, დეპარტამენტების წარმომადგენლები, რომლებიც კონკრეტულ თემატიკას უნდა პასუხობდნენ და ამზადებდნენ საზოგადოებას.
ამასთან, როგორც სანიკიძემ აღნიშნა, სამინისტრო ძალიან მონდომებით ემზადებოდა სწავლის დასაწყებად საკლასო ოთახებში და არა დისტანციურად.
"არ მეგულება ქვეყანა და მათი საგანმანათლებლო სისტემები, რომელიც პანდემიურმა სიტუაციამ არ დააყენა გამოწვევის წინაშე. გამონაკლისი ჩვენც არ ვართ. დისტანციური სწავლების დანერგვა სწორედ ამ საჭიროებამ განაპირობა.
ძალიან ბევრი რამ გაკეთდა, გასაგებია, ხარვეზები არის და რჩება, თუმცა ასეთი სისტემის ამოქმედება ონლაინ და დისტანციურად სწავლება, სკოლის დონეზე და განსაკუთრებით, დაწყებით საფეხურზე, რთული, შრომატევადი და გრძელვადიანი პროექტია", - განაცხადა თამარ სანიკიძემ.