ეკატერინე მიქაბაძე - საგულისხმოა, რომ როგორც საერთაშორისო სავალუტო ფონდი, ასევე აზიის განვითარების ბანკი საქართველოს ეკონომიკის განვითარების შესახებ ოპტიმისტურ პროგნოზს აკეთებს

საგულისხმოა, რომ როგორც საერთაშორისო სავალუტო ფონდი, ასევე აზიის განვითარების ბანკი საქართველოს ეკონომიკის განვითარების შესახებ ოპტიმისტურ პროგნოზს აკეთებს, - ამის შესახებ ეკონომიკისა და მდგრადი განვითარების მინისტრის პირველმა მოადგილემ ეკატერინე მიქაბაძემ საერთაშორისო საფინანსო ორგანიზაციების შეფასებების კომენტირებისას განაცხადა.

მისი თქმით, ბანკის ანგარიშის თანახმად, საქართველოში პანდემიის გავლენის მიუხედავად სტაბილიზაციის ნიშნები სახეზეა.

„საერთაშორისო სავალუტო ფონდმა დღეს გამოქვეყნებულ რელიზში დადებითად შეაფასა საქართველოს ეკონომიკური პოლიტიკა, მათ შორის, გადასახადების მიზნობრივი შემსუბუქება და ჯანდაცვისა და სოციალური ხარჯების გაწევა მოწყვლადი ჯგუფების მხარდასაჭერად და აღნიშნა, რომ ის წარმატებულია სოციალურ და ეკონომიკურ მდგომარეობაზე პანდემიის უარყოფითი გავლენის შეკავების თვალსაზრისით. საგულისხმოა, რომ სავალუტო ფონდის შეფასება უნისონში მოდის აზიის განვითარების ბანკის მოსაზრებებთან, რომელიც მან 2020 წლის ყოველწლიურ რეგიონულ ეკონომიკურ მიმოხილვაში საქართველოსთან მიმართებაში გამოთქვა. ბანკის ანგარიშის თანახმად, საქართველოში პანდემიის გავლენის მიუხედავად სტაბილიზაციის ნიშნები სახეზეა,“ - განაცხადა მინისტრის მოადგილემ.

მისი თქმით, ორივე საფინანსო ინსტიტუტის პროგნოზი 2021 წლის საქართველოს ეკონომიკის ზრდის მაჩვენებელთან დაკავშირებით ძალიან პოზიტიურია - აზიის განვითარების ბანკის პროგნოზით, საქართველოს ეკონომიკა 2021 წელს 4.5%-ით გაიზრდება. უფრო ოპტიმისტურია საერთაშორისო სავალუტო ფონდის პროგნოზი, რომლის თანახმადაც საქართველოს ეკონომიკა მომავალ წელს 5 პროცენტით გაიზრდება.

„ორივე ორგანიზაცია თავის შეფასებებში განსაკუთრებულ აქცენტს აკეთებს პანდემიის გავლენის შესამსუბუქებლად საქართველოს მთავრობის მიერ გატარებული პოლიტიკის ეფექტურობაზე. სავალუტო ფონდის მისიის შეფასებით, წლის მეორე ნახევრიდან ადგილობრივმა მოთხოვნამ ზრდა დაიწყო, რაც არის იმის გარანტია, რომ ეპიდემიოლოგიური მდგომარეობის გაუმჯობესებასთან ერთად, ეკონომიკა შეძლებს ჩვეული ტემპებით მუშაობის გაგრძელებას. მისიის განცხადებით გადასახადების მიზნობრივი შემსუბუქება და მოწყვლადი სოციალური ფენების დახმარება საკმაოდ ეფექტური აღმოჩნდა პანდემიის სოციალური და ეკონომიკური გავლენის შეკავების თვალსაზრისით. რაც შეეხება აზიის განვითარების ბანკს, ეკონომიკასა და საინვესტიციო კლიმატზე პანდემიის უარყოფითი ზემოქმედების მიუხედავად, მას საქართველოს ეკონომიკური ზრდის საპროგნოზო მაჩვენებლები არ გაუუარესებია. საერთაშორისო სავალუტო ფონდის შეფასებით, მნიშვნელოვანია, რომ პანდემიის მიუხედავად საქართველოს მთავრობა წარმატებით აგრძელებს სტრუქტურული რეფორმების განხორციელებას და სწორედ ეფექტიანი ანტიკრიზისული ღონისძიებები და მიმდინარე რეფორმები არის იმის საფუძველი, რომ ეკონომიკა მალე დაუბრუნდება პანდემიამდე არსებულ პოზიტიურ ტრენდს,“ - აღნიშნა ეკატერინე მიქაბაძემ.

ინფორმაციას საქართველოს ეკონომიკის სამინისტროს პრესსამსახური ავრცელებს.

მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
ემილ ავდალიანი - არაბული ქვეყნებისთვის და ირანისთვის ახლო აღმოსავლეთის რეგიონთან ჩინეთის ურთიერთობის სუფთა წარსული მეტად მიმზიდველია
ქართული პრესის მიმოხილვა 28.03.2024
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს