ფეხბურთელ გიორგი შაქარაშვილის საქმეზე ბრალდებული არასრულწლოვნების სასამართლო პროცესზე დაზარალებული, დიჯეი კონსტანტინე ღიბრაძე დაიკითხება.

სასამართლო პროცესზე, რომელიც ამ წუთებში მცხეთის რაიონულ სასამართლოში მიმდინარეობს, ასევე ერთ-ერთ მოწმეს დაკითხავენ, რომელიც საქმის პროკურორის, ნანა გუგუტიშვილის განცხადებით, მცხეთის ტერიტორიაზე იმ დროს გადაადგილდებოდა, როცა „მერსედესის" მგზავრები ძალადობას ახორციელებდნენ.

„დღევანდელ პროცესზე ერთ-ერთი დაზარალებული, კონსტანტინე ღიბრაძე დაიკითხება, ასევე წარმოდგენილია მოწმე ლერი მჭედლიძე და გამოკვლევა მოხდება ვიდეომასალისა და წერილობითი მტკიცებულებების. ლერი მჭედლიძე სატრანაპორტო საშუალებით მაშინ გადაადგილდებოდა, როცა „მერსედესის" მგზავრების მიერ თავდასხმა ხორციელდებოდა. კონსტანტინე ღიბრაძე არის დაზარალებული, ის არ შესწრებია ძალადობის განხორციელების ყველა ეპიზოდს, თუმცა, იმ ქმედებებთან დაკავშირებით, რაც უშუალოდ, მასთან, როგორც დაზარალებულთან განხორციელდა, ისაუბრებს. მოლოდინი გვაქვს, რომ რისი შემსწრეც არის, იმას დაადასტურებს", -განაცხადა გუგუტიშვილმა.