საქართველოს ადგილობრივ თვითმმართველობათა ეროვნული ასოციაციის (NALAG) და ევროპის საბჭოს რეგიონთა კონგრესის ვიცე-პრეზიდენტმა თამარ ტალიაშვილმა, ასევე ათეა-ს აღმასრულებელი საბჭოსა და ევროპის საბჭოს კონგრესის წევრმა ნინო ქავთარაძემ, ევროპის საბჭოს კონგრესის მონიტორინგის კომიტეტის სხდომაში მიიღეს მონაწილეობა. ამის შესახებ ინფორმაციას საქართველოს ადგილობრივ თვითმმართველობათა ეროვნული ასოციაცია ავრცელებს.
სხდომაზე, რომელიც ონლაინ რეჟიმში წარიმართა, წევრი ქვეყნების მიერ წარმოდგენილი ადგილობრივი თვითმმართველობის ევროპული ქარტიის მონიტორინგის შედეგებზე, ადგილობრივ და რეგიონულ დონეზე ადამიანის უფლებათა დაცვის საკითხებზე, ასევე Covid-19- ით გამოწვეული მსოფლიო კრიზისის დაძლევის გზებზე იმჯელეს და პანდემიის პირობებში ადგილობრივი და რეგიონული არჩევნების სადამკვირვებლო მისიის ანგარიშები განიხილეს.
,,კონგრესის გენერალურმა მდივანმა ანდრეას კიფერმა და მონიტორინგის კომიტეტის თავმჯდომარემ ლეენდერტ ვერბეკმა კონგრესის მიმდინარე საქმიანობა შეაფასეს და სხდომის მონაწილეებთან ერთად სამომავლო გეგმებზე იმსჯელეს. როგორც შეხვედრაზე აღინიშნა, ევროპის საბჭოს კონგრესის მონიტორინგის კომიტეტის მორიგი შეხვედრა, მიმდინარე წლის ოქტომბრის ბოლოს გაიმართება,“ - ნათქვამია ინფორმაციაში.