ჯანმრთელობის მსოფლიო ორგანიზაციის ინფორმაციით, ამჟამად მსოფლიოში 175 კანდიდატი ვაქცინაა, აქედან ადამიანებზე ტესტირების ეტაპს 34 ვაქცინა გადის. ჯანდაცვის მსოფლიო ორგანიზაციაში აცხადებენ, რომ გამოცდის ბოლო მესამე ფაზაზე AstraZeneca, Moderna, CanSino და Gamaleya Research Institute კანდიდატები გადადიან.

„ამჟამად 175 -ზე მეტი ვაქცინაა, რომლებსაც კანდიდატ ვაქცინებს ეძახიან და ისინი განვითარების სხვადასხვა საფეხურზე არიან. ამჟამად მსოფლიოს მასშტაბით 34 ვაქცინა არის ადამიანებზე გამოცდის ეტაპზე და და ასევე გვაქვს ვაქცინები, რომლებმაც წარმატებას მიაღწიეს და ცდის საბოლოო მესამე ეტაპზე გადავიდნენ. ზოგადად რომ ვიცოდეთ, ვაქცინის წარმატების მაჩვენებელი არის 10%, ანუ ვაქცინების მხოლოდ 10% ითვლება წარმატებულად. ვაქცინები გადიან ახლა დაჩქარებულ პროცესს, რომელიც ზოგიერთ შემთხვევაში 8-ჯერ არის დაჩქარებული და ამას თავისი გამოწვევები აქვს და სირთულეებთან ერთად ახლავს უფრო მეტი პასუხისმგებლობა როგორც მწარმოებელის, ასევე მაკვალიფიცირებელი ორგანიზაციის მიმართ, მათ შორის, ჯანმრთელობის მსოფლიო ორგანიზაციის მიმართაც. ტესტირების ეტაპზე უკვე 34 ვაქცინა გადის,“- განაცხადა ვასილი ესენამანოვმა.

მისივე თქმით, ვაქცინის შექმნის შემდეგ რამდენიმე გამოწვევა კვლავ რჩება, მათ შორის ვაქცინის ეფექტურობის ხანგრძლივობა, საკმარისი რაოდენობის წარმოება მთელი მსოფლიოსთვის და ანტი-ვაქცინაციის მოძრაობასთან გამკლავება.