ფოთის საზღვაო ნავსადგურის მოდერნიზაციის პროგრამისა და საოპერაციო ეფექტურობის მუდმივი გაუმჯობესების პროცესის ფარგლებში, „ეიპიემ ტერმინალს ფოთმა“ 8 ახალი ტერმინალის უნაგირამაწევარა შეიძინა,- ამის შესახებ „ინტერპრესნიუსს“ „ეიპიემ ტერმინალს ფოთიდან“ აცნობეს.

„ტერმინალის უნაგირამაწევარა სპეციალური ნახევარმისაბმელით ნავსადგურის ნავმისადგომებსა და საკონტეინერო ტერიტორიას შორის ტვირთების უსაფრთხოდ გადასაზიდად გამოიყენება და ზრდის საოპერაციო პროცესების შეუფერხებლობასა და საიმედოობას. აღნიშნული თანამედროვე ტექნიკა აღჭურვილია ნავსადგურის საოპერაციო სისტემასთან ინტეგრირებული მობილური კომპიუტერით, რაც კონტეინერების მოძრაობასთან დაკავშირებული ინფორმაციის რეალურ დროში მიმოცვლის საშუალებას იძლევა.

ფოთის საზღვაო ნავსადგურის უახლესი ტექნიკური საშუალებებით აღჭურვა მორიგი ნათელი მაგალითია თანმიმდევრული მზადებისა სამომავლო გეგმების და გამოწვევებისთვის, რაც გულისხმობს საქართველოს უდიდესი პორტის განვითარებას და მისი მომხმარებლებისთვის კიდევ უფრო მაღალი ხარისხის მომსახურების მიწოდებას“,-აღნიშნულია კომპანიის მიერ გავრცელებულ ინფორმაციაში.