რუსი ოპოზიციონერი პოლიტიკოსი ალექსეი ნავალნი „ტვიტერის“ პირად გვერდზე იმ ვარაუდს ეხმაურება, რომლის თანახმადაც, მის მოწამვლასთან მისი უახლოესი გარემოცვაა დაკავშირებული.
„ცოტა დავიბენი... მოწამვლა არ იყო, ეს იყო დიაბეტის შეტევა. რუსეთში არასოდეს შეუქმნიათ „ნოვიჩოკი“. მოწამვლა იყო, მაგრამ ეს გერმანელებმა გააკეთეს. მოწამვლა იყო, მაგრამ მე მოვიწამლე საკუთარი თავი - მგონია, რომ კრემლში მთელი დეპარტამენტი გახსნეს ახალი ვერსიების შესაქმნელად“ , - წერს ნავალნი სოციალურ ქსელში.
მანამდე რუსულ მედიაში გავრცელდა „ნოვიჩოკის“ შემქმნელის ვლადიმერ უგლიოვის კომენტარი, რომელიც მიიჩნევს, რომ ვიღაცამ რაღაცაზე წაუსვა შხამი და უშუალოდ ნავალნის მიაწოდა ხელში.