ჩვენი ფუნქცია არ მოიცავს არც ზედამხედველობის ან დახმარების გაწევას, არც ჩარევას. ჩვენი როლი და ფუნქცია იქნება, უბრალოდ დავაკვირდეთ არჩევნებს,- ამის შესახებ ეუთო-ს დემოკრატიული ინსტიტუტებისა და ადამიანის უფლებების ოფისის (OSCE/ODIHR) სადამკვირვებლო მისიის ხელმძღვანელმა, ელჩმა ჯილიენ სტირკიმ პრესკონფერენციაზე განაცხადა.
ჯილიენ სტირკის განცხადებით, სადამკვირვებლო პროცესის დროს გაიმართება შეხვედრა შესაბამისი უწყებების წარმომადგენლებთან, პოლიტიკურ პარტიებთან, სამოქალაქო საზოგადოებასთან, მედიასა და საერთაშორისო ორგანიზაციებთან.
„ჩვენ ამ არჩევნებს არ ვადარებთ ადრე ჩატარებულ სხვა რომელიმე არჩევნებს არც საქართველოში და არც სხვაგან. ჩვენი ფუნქცია არ მოიცავს არც ზედამხედველობის ან დახმარების გაწევას, არც ჩარევას. ჩვენი როლი და ფუნქცია იქნება, უბრალოდ დავაკვირდეთ, რაც აისახება სამომავლოდ მომზადებულ ანგარიშებში.
ჩვენი სადამკვირვებლო მისიის საქმიანობის ფარგლებში, დავაკვირდებით ისეთ საკითხებს, როგორიც არის ადმინისტრაციული მომზადება, ამომრჩევლებისა და კანდიდატების რეგისტრაცია, საარჩევნო კამპანიის ფარგლებში განხორციელებული საქმიანობა, კამპანიის დაფინანსება”,-განაცხადა ჯილიენ სტირკიმ.
შეგახსენებთ, ეუთოს დემოკრატიული ინსტიტუტებისა და ადამიანის უფლებების ოფისმა საქართველოში 2020 წლის საპარლამენტო არჩევნებისთვის სადამკვირვებლო მისია გახსნა.