„ერთიანი საქართველოს“ ერთ-ერთი ლიდერის ანზორ ბიწაძის განცხადებით, ოპოზიცია ერთიანია და მოახერხებენ არჩევნებზე ერთმანეთის ხმები დაიცვან.
როგორც ბიწაძემ ამომრჩეველთა ხმების დაცვის გაერთიანებული შტაბის სხდომის შემდეგ განაცხადა, არჩევნებზე ძირითადი პრობლემები მმართველი გუნდის მხრიდან პანდემიით მანიპულირება, ადამიანების დაშინება და პოლიტიკაში კრიმინალების ჩართვა იქნება.
„ხელისუფლებამ უნდა იცოდეს, რომ არანაირი პარტიული კუთვნილება არ აქვს ადამიანების ჩაგვრას, დაშინებას, მოსყიდვას, მანიპულაციას. როგორი იმედებიც არ უნდა ჰქონდეს ხელისუფლებას დამყარებული რაიმე გზაზე ამ მიზნის მისაღწევად, მოვახერხებთ, რომ დავიცვათ ერთმანეთის ხმები, დავიცვათ ერთმანეთი მოსყიდვისგან, დავიცვათ ერთმანეთი ადამიანების დაშინებისგან და იმ უხეში მეთოდების გამოყენებისგან, რომლითაც დაკავებულია „ქართული ოცნება“. ფაქტია, რომ ამ არჩევნებზე გვექნება შემდეგი პრობლემები - პანდემიით მანიპულირება, ადამიანების მოსყიდვა, დაშინების მცდელობა, კრიმინალის ჩართვა პოლიტიკაში, რასაც ოპოზიცია არ დაუშვებს. ოპოზიცია რჩება ერთიანი იმ მთავარი გენერალური მიზნის მისაღწევად, რასაც ჰქვია „ქართული ოცნების“ ხელისუფლებიდან გაშვება და ამის მისაღწევად აუცილებლად დავიცავთ ერთმანეთის ხმებს, მიუხედავად პარტიული კუთვნილებისა“,- განაცხადა ბიწაძემ.